Persona të armatosur dhe ende të paidentifikuar nga policia kanë tentuar të grabisin shtëpinë e prindërve të Elton Çiços, i cili është ekzekutuar më 1 maj të 2016-ës në një lokal në Tiranë.
Shtëpia e të moshuarve ndodhet në lagjen “Blloku i ri” në qytetin e Tepelenës, dhe sipas informacioneve paraprake është tentuar të grabitet gjatë orëve të para të mëngjesit të kësaj të premteje. Në banesë jetojnë prindërit e të ndjerit, ndërsa sipas dëshmive të fqinjëve, janë dëgjuar edhe të shtëna me armë.
E njëjta banesë është grabitur disa vite më parë, ku edhe janë dhunuar prindërit e Çiços si dhe janë vjedhur një shumë parash. Nga kjo grabitje nisi një zinxhir vrasjesh, që i mori edhe jetën vetë Elton Çiços.
Ai u ekzekutua në lokalin “De Niro” në Tiranë, teksa ndodhej në tavolinë edhe me persona të tjerë.
Ndërsa autor i këtij krimi është identifikuar Jani Aliaj. Mes tyre ka pasur konflikte që nga koha kur Çiço dhe Aliaj, të dy me precedentë penalë, kishin qenë në burgun Koridhalos në Greqi.
