Kryeministri Edi Rama i është kushtuar sot, Akademisë së Shkencave. Në mesditë ai ka nisur një takim me akademikët por duke ua bërë të qartë se ata e kanë çuar institucionin në kalbëzim.
Rama tha se kishte ardhur për të dëgjuar, pasi "reformimit me rrënjë i Akademisë së Shkencave është e vetmja rrugë për të dalë nga inercia e kalbëzimit dhe drejtuar sytë nga e ardhmja".
“Humbët më shumë se një vit me një inerci, - tha Rama, - që është ajo e kalbëzimit të vazhdueshëm të një institucioni që u krijua si xhevahiri më rrezatues i kurorës së dijes shqiptare dhe sot është burim pezmatimi permanent, brengë për të gjithë ata që e themeluan Akademinë e Shkencave dhe i dhanë shkëlqimin e autoritetit të tyre. Kjo situatë na ka shtyrë të çojmë para idenë e refuzimit për të financuar më tutje këtë institucion me paratë e taksapaguesve shqiptarë”- tha Rama.
