Në pak orë, Forcat e Armatosura arritën të nxjerrin nga izolimi banorët e Darëzezës në Fier, pas prishjes së urës si rezultat i reshjeve të dendura që kanë përfshirë të gjithë territorin e vendit në 3 ditët e fundit.
Ura Beili u vendos mbi urën e dëmtuar në Darëzezë nga Forcat e Armatosura mbrëmjen e së dielës.
Forcat e Armatosura janë prej tre ditësh në gatishmëri dhe po punojnë pa ndërprerje në të gjithë jugun e vendit, aty ku situata paraqitet me problematike.
Kryetari i Bashkisë së Fierit, Armando Subashi, siguroi se puna do të vazhdojë pa ndërprerje deri në përfundimin e rindërtimit të urës dhe rikthimin e saj në funksion të plotë.
Ura e Darëzezës lidh rreth 2 mijë banorët e kësaj zone me rrethinat e tjera dhe qytetin e Fierit.
