Kryetarja e LSI-së, Monika Kryemadhi e ka konsideruar si një tjetër hap emancipues shtetëror miratimin nga ana e Kuvendit të Maqedonisë përdorimin e gjuhës shqipe.
Nnë një reagim në facebook, Kryemadhi thotë se njohja dhe pranimi i realitetit në Maqedoni është një progres.
"Pas vendimit për shpalljen festë zyrtare të ditës së alfabetit, ditës së Kongresit të Manastirit, miratimi i ligjit të dygjuhësisë në Maqedoni është një hap tjetër emancipues shtetëror. Heqja dorë nga tabutë, duke përfshirë heqjen dorë nga emri historik, siç deklarohet; dhe çlirimi nga frika prej gjuhës së tjetrit, përbëjnë dukuri evropianizuese të Maqedonisë fqinje, të cilën Shqipëria e njohu e para si shtet të pavarur. Të heqësh dorë nga monolinguizmi do të thotë të pranosh barazinë me tjetrin, shumicë a pakicë qoftë. Kufiri i gjuhës nuk kontrollohet nga kufiri i shtetit! Njohja dhe pranimi i këtij realiteti është progres", shkruan Kryemadhi.
