Sot pasdite përpara Ministrisë së Jashtme të Shqipërisë janë mbledhur qytetarë nga komuniteti çam, të organizuar ndër të tjera në shoqatën “Çamëria”, ata që kanë protestuar në lidhje me marrëveshjen e shtetit shqiptar me atë grek.
Shoqata “Çamëria” veçanërisht ka ngritur zërin, duke u shprehur se Shqipëria është duke nderuar ushtarët grekë që kanë rënë në Shqipëri, kurse Greqia nga ana tjetër nuk ka njohur dhe nuk po njeh gjenocidin e ushtruar kundrejt popullatës çame në shtetin helen. I pranishëm në protestë ka qenë edhe kryetari i PDIU Shpëtim Idrizi.
Nisja e gërmimeve për ushtarët grekë në Tepelenë po zë një vend në mediat e huaja. AFP nënvizon se Ministria e Jashtme greke po e quan këtë një moment historik.
