Të tjera detaje kanë dalë në dritë rreth grekut Efthymiou Efthymious, i dyshuari kryesor si vrasës me pagesë i shqiptarit Devi Kasmi në Tiranë.
Përmes një konference për mediat, drejtori i Policisë së Tiranës Ardi Veliu tha në mesditë se, greku Efthymiou Efthymious iu gjet një shumë parash, që dyshohet se ishte një pjesë e pagesës për vrasjen e Devi Kasmit.
Burimet kanë treguar se ish-oficerit të Forcave Speciale greke, i janë sekuestruar 2 mijë euro dhe 50 mijë lekë shqiptare. Besohet se kjo shumë përbën një pjesë të parave të dhëna si shpërblim për vrasjen e kryer.
Shtetasi grek është vetëdeklaruar si ish-punonjës i forcave speciale të policisë greke nga viti 1992 deri në vitin 2012.
Efthymious ishte përjashtuar nga forcat speciale të policisë greke, pasi rezultonte i dënuar për trafik droge në Gjermani.