Pas rreth një orë në Prokurorinë e Krimeve të Rënda, ish Ministri i Inrastrukturës Edmond Haxhinasto ka deklaruar se ka deponuar përpara prokurorëve për përgjegjësitë dhe rolin e tij në lidhje me aksin Tiranë- Elbasan, rrugë për të cilën qëndrojnë në burg tashmë prej disa javësh një sërë drejtuesish të lartë të Autoritetit Rrugor Shqiptar.
Ashtu si edhe herët e tjera, Haxhinasto është shprehur i hapur ndaj drejtësisë dhe hetimeve që po kryhen nga organi i akuzës për aksin rrugor Tiranë- Elbasan.
“Më pyetën për përgjegjësit e mia si drejtues politik. Dëshmova për ato gjëra që kanë të bëjnë me përgjegjësitë e mia kur kam qenë në një periudhë të zhvillimit të këtij projekti. Jam thirrur si person për të dëshmuar në projektin e Rrugës Tiran-Elbasan”. u shpreh Haxhinasto.
Dosja e rrugës Tiranë Elbasan ka patur një tjetër zhvillim këtë të hënë, në Gjykatën e Apelit në Durrës, atje ku Dashamir Xhika dhe një sërë ish drejtuesish të lartë të ARRSH-së kërkuan lirimin nga masa me burg. Pavarësisht kërkesës edhe Apeli i ka lënë në burg zyrtarët e akuzuar për veprat e korrupsionit dhe shpërdorimit të detyrës.
Vetë ish Ministri Haxhinasto është shprehur i gatshëm për t’u verifikuar, por ka theksuar se nëse hetimit do të degjenerojë në një goditje politike, edhe ai do të përgjigjet politikisht shumë rreptë.
