Ish – Kryeministri Berisha reagoi për komentin e bërë nga Delegacioni i Bashkimit Europian në Tiranë në lidhje me akuzat e tij se ambasadorja Vlahutin i kishte kërkuar ish – kryeprokurorit Llalla arrestimin e tij.
Zyra e Bashkimit Europian në Tiranë, në një përgjigje për Televizionin Klan, i quajti pretendimet si trillime dhe të pabaza.
Por ish – Kryeministri e përforcon qëndrimin e tij, duke thene se ato që delegacioni i quan si trillime, janë informacione që i kanë adhur nga diplomatë perëndimore apo burime tepër serioze.
Berisha shkruan në faqen e tij në Facebook se ne vitin 2015 ambasadori i njërit prej vendeve kryesore, më shumë se një herë është shprehur se ambasadorja Romana Vlahutin i ka kërkuar kryeprokurorit arrestimin e tij.
Ai thote se personalisht, edhe pse nuk mund ta merrte këtë si trillim, e ka injoruar totalisht si nje akt militantesk e qesharak.
Një tjetër konfirmim është ai që Berisha thotë se ka marrë nga Presidenti Nishani, i cili ishte informuar nga kryeprokurori Llalla.
Pas kësaj, shkruan ai, zonja Vlahutin kishte kërkuar ta takonte për ta sqaruar për këtë problem, por ai e kishte refuzuar.
Shprehet se këtë çështje e ka bërë publike së paku edhe dy herë të tjera dhe asnjë nuk e ka përgënjeshtruar.
Berisha thotë se dëshiron të sigurojë delegacionin e BE-së në Tiranë se qëndrimet e tij publike ndaj aferës së kontratës së vilës në Mullet, të blerë me 4 700 Euro metrin katror, mbi tre herë më shumë se çmimet ekzistuese në zonë, nuk kanë absolutisht asnjë lidhje me problemin e mësipëerm.
“Ato kanë në bazë bindjen time se aferat e dyshimta duhen hetuar kudo që shfaqen”, shkruan ai.
Përsa i përket frikës së shprehur nga ambasadorja Vlahutin, se zyra e saj mund të përgjohej nga zyra e Berishës që janë në të njëjtën ndërtesë, ish – Kryeministri thotë se edhe ai e ka konsideruar vërtet të vajtueshëm një pretendim të tillë, por siguron se ka bërë publike vetëm atë që është thënë nga burime tejet serioze, pa shtuar absolutisht asnjë fjalë apo presje!