Nënkryetari i PD-së, Edi Paloka, tha se opozita do të protestojë më 26 maj për të kërkuar largimin e Fatmir Xhafaj si ministër i Brendshëm dhe në vazhdim të saj për të treguar se nuk mund të pranohet një qeveri që është e lidhur me krimin dhe interesat kriminale. Sipas Palokës, hapi i parë i protestës është largimi i Fatmir Xhafajt.
“Protesta iniciohet nga skandali i fundit, dhe kërkesa kryesore është largimi i Fatmir Xhafajt. Por ne dhe të gjithë shqiptarët e dimë se Xhafaj është ministër i Brendshëm, sepse Edi Rama është Kryeministër. Sot ne bëmë një takim të gjatë me të gjithë forntin opozitar, diskutuam gjerësisht për mënyrën dhe kronologjinë e këtij skandali të fundit dhe arritëm në konkluzionin se duhet një protestë e fuqishme në Tiranë, e cila do të zhvillohet pranë Kryeministrisë”, tha Paloka.
Nënkryetari i PD-së i cilësoi si bajate justifikimet e Ramës, sipas të cilit opozita kërkon të bllokojë negociatat.
“Saimir tahirin apo Fatmir Xhafajn nuk i vuri PD si ministra, as i tha Tahirit apo Xhafajt merru me Habilajt apo mbro vëllain trafikant droge. Këto i mori Rama, i vuri ministra. Të gjitha të zezat që bën ky Kryeministër dhe kjo qeveri opozita nuk mund të rrijë pa i denoncuar. Nëse Europa i vë kushte të reja Ramës, nuk do të thotë se ka ndryshuar Europa. Janë të njëjtët që na liberalizuan vizat, që na dhanë statusin e vendit kandidat, atëherë pse vendosin kushte të reja? Sepse kështu çdo ditë plas nga një skandal”, tha Paloka.
