Pronari i një guroreje ka denoncuar tek kryeministri Edi Rama ish-drejtorin e policisë në Selenicë, Bernard Çaushin për ushtrim dhune.
Në Panarin e Punës në Elbasan, pronari i gurores tha se ish-drejtori i policisë nuk e lejon që të ushtrojë aktivitetin e tij prej 2 vitesh duke i bllokuar rrugët dhe shkatërruar mjete. Rruga është e bashkisë, por sipas tij Çaushi nuk e lejon të punojë sepse ka guroren e vet ngjitur me të.
Ai shprehet se zotëron lejen nga bashkia dhe se ka kërkuar disa herë ndihmë, por nuk ka gjetur zgjidhje. Kryeministri Rama i la numrin e kontaktit dhe i kërkoi që me mesazh t’i tregonte të gjitha detajet e ngjarjes në mënyrë që ti zgjidhte problemin.
Pronari i gurores: Kemi pengesat tona, por e përgjithshmja ecën mirë. Ne kemi nevojë për 10 punonjës. Por kemi pasur probleme në punë. Meqë erdhët, do t’ju tregoj edhe disa fotografi që i shërbejnë punës. Kemi një gurore me ekskavatorët më të mirë. Ne kemi guroren tonë në Selenicë në Vlorë.
Edi Rama: Ku është problemi juaj?
Pronari i gurores: Ish-drejtori i policisë, Bernard Çaushi na ka bllokuar rrugën prej dy vitesh, ka ushtruar dhunë, duke thyer mjetet. Nuk funksionon. Kemi kërkuar ndihmë shumë herë.
Edi Rama: Përse e ka mbyllur rrugën?
Pronari i gurores: Kjo rruga është e bashkisë, i kemi marrë edhe letrat të gjitha, nuk na le të kalojmë, ngjitur me ne ka guroren e vet.
Edi Rama: Po ai punon?
Pronari i gurores: Po punon, është ish-drejtori i policisë në Selenicë.
Edi Rama: Më dërgo një mesazh mua në numrin tim dhe më shpjego më me detaje.