Ministrja e Shëndetësisë nuk ia lë mangët Vasilit: Duhet të trajtohesh për halucinacionet

Shqipëria

Ministrja e Shëndetësisë nuk ia lë mangët Vasilit: Duhet të trajtohesh për halucinacionet

Nga: N. Sh Më: 20 gusht 2018 Në ora: 15:10
Ogerta Manastirliu dhe Petrit Vasili

Ministrja e Shëndetësisë, Ogerta Manastirliu, nuk ka humbur aspak kohë, por i është kundërpërgjigjur Petrit Vasilit, në lidhje me akuzat për shëndetësinë.

Me anë të  një statusi në Facebook, ajo shkruan se deklaratat e ish-ministrit të Shëndetësisë, nuk meritojnë asnjë reagim tjetër përveç keqardhjes njerëzore.

Ajo bën me dije se sa i takon alarmeve në lidhje me epidemitë e mundshme që mund të shfaqen në territorin e Shqipërisë, Ministria e Shëndetësisë dhe Mbrojtjes Sociale, ka zgjedhur të reagojë institucionalisht.

Manastirliu nuk ndalet me kaq, duke u shprehur se do të vijojnë të komunikojnë me transparencë me qytetarët, për të marë një shërbim shëndetësor me cilësi dhe sa më pranë vendbanimit.

Postimi i plotë:

Deklaratat e ish Ministrit të Shëndetësisë, nuk meritojnë asnjë reagim tjetër përveç keqardhjes njerëzore. Por mundësia që ai na jep për të komunikuar të vërtetat, nuk mund të humbet në asnjë rast.

Ministria e Shëndetësisë dhe Mbrojtjes Sociale, ka zgjedhur të reagojë institucionalisht, përmes institucioneve përgjegjëse, në lidhje me alarmet mbi epidemitë e mundshme që mund të shfaqen në territorin e Shqipërisë.

Instituti i Shëndetit Publik, në varësi të Ministrisë së Shëndetësisë dhe Mbrojtjes Sociale, është i vetmi institucion shtetëror, që ka autoritetin dhe ekspertizën e nevojshme, për t'u shprehur në lidhje me epidemitë. ISHP është shprehur me një qartësi shembullore, në lidhje me Ethet e Nilit Perëndimor. Për masat e marra, për mungesën e këtij virusi gjatë dy viteve të fundit në Shqipëri, për vendosjen e survejancës dhe për forcimin e kapaciteteve laboratorike për diagnostikimin e tij.

Ekspertët e MSHMS dhe ISHP-së po e bëjnë detyrën e tyre: janë vigjilentë dhe në gatishmëri të plotë, kundër epidemive si Ethet e Nilit, apo Fruthit.

Padyshim, ne të parët jemi të vetëdijshëm se kemi ende shumë rrugë për të bërë, për të mbërritur tek Shëndetësia që ne duam.

Ne do të vazhdojmë të komunikojmë institucionalisht dhe me transparencë me qytetarët, qoftë për politikat që jemi duke ndjekur në fushën e Shëndetësisë, qoftë për masat që jemi duke marrë në lidhje me parandalimin e sëmundjeve dhe mbrojtjen e shëndetit të tyre, qoftë për ndërhyrjet që jemi duke bërë me qëllim përmirësimin e infrastrukturës, me qëllim që ata të marrin një shërbim shëndetësor me cilësi dhe sa më pranë vendbanimit. Kjo është detyra jonë, kjo është detyra e të gjithë ekspertëve në sistemin shëndetësor, të cilët janë papushim në krye të detyrës.

Ne zgjedhim të ofrojmë shërbim për qytetarët, institucionet tona janë në shërbim të qytetarëve. Puna dhe përpjekjet e tyre ndryshojnë si nata me ditën, me një kohë kur në ministri, shpikeshin viruse e sëmundje për të shpikur më pas edhe nevojën për vaksina dhe ilaçe të skaduara që bliheshin me paratë e shqiptarëve.

Në Shëndetësinë e asaj kohe aspak të largët, qytetarët ishin të fundit. Në Shëndetësinë që duam qytetarët janë të parët. Dhe si qytetar, ish ministri Vasili do të ketë të gjithë vëmendjen e shërbimit publik shëndetësor nëse do të vendosë të trajtohet për haluçinacionet e tij.

commentFirst article
Sot mund të lexoni Shfletoni kopertinat