Futbolli shqiptar është tronditur nga ndarja e parakohshme nga jeta e ish-legjendës së Flamurtarit, Alfred Ziaj. Ish-futbollisti që të enjten festoi 52-vjetorin e lindjes ishte shtruar në gjendje të rëndë në spitalin “Nënë Tereza”.
Prej problemeve shëndetësore ishte parashikuar që Ziaji, i cili ka qenë edhe pjesë e Kombëtares shqiptare të futbollit, t’i nënshtrohej një transplanti në mëlçi.
Megjithatë, gjendja e tij ishte rënduar së tepërmi. Mjekët nuk mund të bënin më asgjë për ta mbajtur në jetë ish-yllin e viteve ’80.
Ziaji ka qenë një prej figurave më të njohura të futbollit në vend. Pas karrierës si lojtar, ai i qëndroi pranë këtij sporti, duke qenë edhe president i Shoqatës Kombëtare të Minifutbollit.
Prej postit të lartë në futbollin e sallave, ai ishte edhe pjesë e Komitetit Ekzekutiv në Federatën Shqiptare të Futbollit.