Struganët e kanë shfrytëzuar ”shtesën për fëmijën e tretë”

Struga

Struganët e kanë shfrytëzuar ”shtesën për fëmijën e tretë”

Më: 9 janar 2017 Në ora: 12:04
Ilustrim

Rreth 945 familje në Strugë përfitojnë shtesën e garantuar mujore financiare për lindjen e fëmijës së tretë referuar të dhënave të Entit për Mbrojtje Sociale, shtesë për të cilën duhet të rinovojnë aplikimin në afat prej 3 muajve.

Sipas të dhënave të konfirmuara nga Enti për Mbrojtje sociale në Komunën e Strugës, shkruan gazeta Koha, këtë benefit e përfitojnë rreth 945 familje prej të cilave vetëm 30 prej tyre kjo asistencë financiare u takon për faktin se familjen e kanë shtuar edhe më fëmijën e katërt, benefit të cilin shteti nuk e jep më dhe përfitues të saj janë vetëm ato gra të cilat kanë lindur fëmijën e katërt në kohën që vlente ky angazhim qeveritar.

Vegim Nura, drejtues i këtij institucioni social në Strugë, informon se në proces është riaplikimi për këtë benefit, procedurë e cila çdo vit parasheh rinovim të dokumentacionit. Ai thotë se nga 945 përfituesit të kësaj ndihme, më shumë se gjysmat janë gra që vinë nga fshati Llabunisht dhe fshatrat tjera të atij rajoni.

Nura sqaron se në fshatrat e tjera dhe në vetë qytetin e Strugës numri i aplikuesve për të fituar këtë asistencë të garantuar nga shteti, është shumë më i pakët nëse krahasohet me Llabunishtin dhe fshatrat përreth tij. “Është e dukshme që numri më i madh i aplikuesve për të fituar ndihmën e garantuar mujore nga shteti për lindjen e fëmijës së tretë dhe të katërt janë nga Llabunishti, Oktisi, Podgorca, tendencë që nuk ka ndryshuar prej kur ka filluar të shpërndahet kjo ndihmë nga shteti”, përfundon Nura.

Sot mund të lexoni Shfletoni kopertinat