Përveç shqetësimit për të bindur konsumatorët të përdorin automjetet me energji elektrike, Tesla tashmë ka një sfidë tjetër në Gjermani, termi “autopilot”.
Zyrtarë të Autoritetit Federal Gjerman të Transportit, (KBA), i kanë kërkuar Tesla-s të mos përdorë më termin “Autopilot” për makinat e saj me asistenëc në drejtim, pasi çon në keqkuptime.
“Mund t’ju konfirmoj se ekziston një letër që i është dërguar Tesla-s me kërkesën që të mos përdorë termin keqkuptues “Autopilot” për sistemin ndihmës në drejtimin e makinës”, ka thënë për Reuters një zyrtar i KBA.
“Për të parandaluar keqkuptimet dhe zhgënjimin e konsumatorëve që po e presin, ju kërkojmë që termin “Autopilot”, mos ta përdorni në reklamimin e sistemit”, thuhet në letrën e agjencisë gjermane.
Përveç të tjerave kjo agjenci gjermane merret edhe me kontrollin e sigurisë në rrugë dhe produktet për to. Tesla nuk ka ende një përgjigje zyrtare për letrën e Gjermanisë, por kjo nuk është hera e parë që termi “autopilot” i kompanisë merret në shqyrtim. Më herët këtë vit një person u vra, teksa mjeti i tij Tesla Model S ishte me Autopilot, ndërsa më vonë u kuptua se ai ishte me shpejtësi të lartë.
