Reportazhi/ Në fshatin e masakrës, atje ku u shua një familje dhe u hap një varrezë e re - Bota Sot
Reportazhi/ Në fshatin e masakrës, atje ku u shua një familje dhe u hap një varrezë e re

Vlora

E martë, 25 shtator 2018

Reportazhi/ Në fshatin e masakrës, atje ku u shua një familje dhe u hap një varrezë e re

Më: 12 gusht 2018 Në ora: 23:03
Varrimi në Selenicë të Vlorës

Një familje u shua pasditen e së premtes në Selenicë të Vlorës. Ndërsa një varrezë e re u hap fare pranë banesave të fisit Zykaj, 8 anëtarë të së cilës nuk jetojnë më.

Amaneti i Demir Zykajt, vëllait të gjyshit të autorit të masakrës së Selenicës, u çua në vend. Sa ishte gjallë, ai u kishte kërkuar të bijve që ta varrosnin në tokat e tij, jo në varrezat e fshatit. Por, Demiri nuk e kishte parashikuar një fund tragjik të tillë për djemtë, gratë e tyre, madje, edhe nipin e mbesën. E kush mund ta kishte menduar?! Aq më tepër, që vdekja do t’u vinte nga nipi i vëllait të tij.

Nga një 24-vjeçar, që e kishte rritur vetë në shtëpinë pranë e që dy ditë më parë, pa iu dridhur dora, vrau të gjithë familjen. Madje, nuk i kurseu plumbat as për kushëririn e vet 8-vjeçar, që e gjeti në tavolinën e bukës. As për kushërirën 15-vjeçe, që kishte mbaruar klasën e nëntë me rezultate të shkëlqyera e që dje u varros bashkë më të vëllain, nënën e babanë. Askush nuk gjen fjalë t’i ngushëllojë të afërmit e tyre. Fjalët janë zëvendësuar nga lotët e ngushëllimet nga kuja që dëgjohet sa merr rrugën për në shtëpitë ku ka rënë morti.

NE FSHATIN E MASAKRES

Në Selenicë të Vlorës, dje nuk flitej për asgjë tjetër, përveç tragjedisë së të premtes, ku 24-vjeçari Ritvan Zykaj ekzekutoi me kallashnikov 8 kushërinjtë e tij. Një masakër e tillë nuk ishte parë e as dëgjuar prej dekadash në vendin tonë.

Tetë arkëmorte dolën dje në orën 14:00 njëri pas tjetrit nga tri shtëpi, të cilave iu kanë mbetur vetëm katër anëtarë. Mes vajit, kujës e lotëve, të afërmit i kanë ndjekur nga pas arkivolet me trupat e tetë familjarëve. Ata u varrosen në tokat e tyre për të çuar në vend amanetin e gjyshit, Demir Zykajt, i cili kërkonte të varrosej në tokën e tij kur të vdiste.

Masakrës mundën t’i shpëtojnë vetëm 3 djem të familjes Zykaj, të cilët nuk ndodheshin në shtëpi. Por, edhe djali tjetër i Demirit, Krenari, i cili ishte në gjumë në momentin e ngjarjes. Nga familja e Besimit ka shpëtuar vetëm një djalë, Albi Zykaj, ndërsa nga familja e Azemit dy djem. Albi Zykaj, 18 vjeç, është fëmija i tretë i Besim Zykajt, ndërsa rezulton të jetë i vetmi i mbijetuar nga familja e tij.

Fatmirësisht, adoleshenti nuk ndodhej në banesë gjatë kohës që ndodhi tragjedia, pasi punonte në bregdet. Albi humbi gjithçka kishte, dy prindërit, Besimin, Vasilikën dhe motrën, Sarën dhe vëllain, Ledjonin. Por edhe gjyshërit e tij, Demirin dhe Perrien, xhaxhain Azemin bashkë me gruan e tij Afërditën.

Albi ka mbetur i vetëm, me xhaxhain e ve shurdhmemec e dy djemtë e xhaxhait, që fatmirësisht, si ai, nuk ndodheshin në shtëpi në momentin e krimit.

Image
Komentet
comments powered by Disqus
Sot mund të lexoni Shfletoni kopertinat
Sondazh
test