Vetëm një ndeshje para përfundimit të pjesës vjeshtore të kampionatit në elitën e volejbollit të Maqedonisë, klubi “Universiteti i Tetovës” ka siguruar titullin e kampionit vjeshtor. Në ndeshjen e javës së tetë që u zhvillua në Manastir kundër Pelisteri Volejit, ekipi i studenteve tetovare shënoi fitore maksimale 0:3 në sete 15:25, 16:25 dhe 22:25. Për ndeshjen në fjalë dhe atmosferën në ekip pas këtij suksesi trajnerja Laureta Abazi për ART Channel, deklaroi.
“Është e vërtet se fitorja e mbrëmshme edhe njëherë vërtetoi dominimin tonë në Ligë, edhe ne arkëtuam tre pike dhe me ato siguruam titullin kampion vjeshtor. Është e vërtet se kjo u arrit si rezultat I punës ekipore e gjithë skuadrës. Domethënë përkushtimit dhe punës së palodhshme të vajzave dhe ne vërtet jemi mjaftë të emocionuara sepse kjo fitore e jona pritej, por edhe titulli kampion vjeshtor është një epitet i parë për skuadrën tonë që shënon dy vjetorin e themelimit të saj”.
Titulli i kampionit vjeshtor pos që paraqet sukses për ekipin, njëherit paraqet edhe obligim pasi në pjesën pranverore e presin sfida shumë të rënda. Po a do të ketë freskime gjegjësisht përforcime në ekip trajnerja Abazi tha se nuk do të ketë nevojë për një gjë të tillë. “Është e vërtet se pjesa tjetër do të jetë akoma më e ngarkuar dhe akoma më e vështirë. Të them të drejtën neve kemi një formacion mjaftë të mirë dhe besoj dhe mendoj se do të vazhdojmë me të njëjtin formacion. Nuk do të ketë ndonjë përforcim por si do që të jetë ne duhet të punojmë akoma më shumë , tu qasemi problematikës akoma edhe më shumë dhe mendoj se paraqitjet tona në pjesën tjetër të jen edhe më dominuese” tha ajo.
Klubi i volejbollit “Universiteti i Tetovës” në javën e fundit të pjesës vjeshtore të kampionatit si nikoqire do të përballet me ekipin Planet, që është një rast i mirë që me fitore e radhës para publikut të vetë të festojnë titullin e kampionit vjeshtor. Me një fjalë, trajnerja Abazi me ekipin e saj ua bëri 8 me 2 maqedoneve.
