Dy përballje të mëdha për të përcaktuar skuadrat që do të kualifikohen në gjysmëfinale të kampionatit botëror të volejbollit për meshkuj, kompeticion që po transmetohet nga Supersport.
Në orën 17:00, në Grupin I do të luhet sfida e fundit Brazil – Shtetet e Bashkuara të Amerikës, që do të përcaktojë ekipin fitues të këtij grupi. Në fakt si amerikanët dhe brazilianët janë kualifikuar në gjysmëfinale, pasi mposhtën Rusinë më dy takimet e para. Brazili triumfoi me rezultatin e ngushtë 3-2, ndërsa SHBA-të dominuan 3-0 në përballjen e një dite më parë. Kemi të bëjmë mes dy ekipeve që janë superfuqi në këtë sport e që kur përplasen me njëri-tjetrin ofrojnë maksimumin për të apasionuarit e kësaj loje.
Në fakt, takimi më interesant do të jetë ai mes Italisë dhe Polonisë, që do të nisë në orën 21:15. Fitorja 3-0 e polakëve me Serbinë e ka komplikuar shumë pozitën e italianëve, që në përballjen e parë humbën me të njëjtin rezultat me serbët. Për të qenë pjesë e “final four”, Zaytzev me shokë duhet të fitojnë 3-0 me Poloninë dhe të mos i lejojnë kundërshtarët të realizojnë më shumë se 60 pikë në total, sepse koeficientët aktualë janë Serbia +15, Polonia +7 dhe Italia -22. Një mision që duket i pamundur, por askush nuk e ndalon skuadrën italiane të ëndërrojë dhe të provojë mrekullinë.