Sekretari i përgjithshëm i OKB-së, Ban Ki-mun, tha se tërmeti në Haiti, i cili mori dhjetëra mijëra jetë, është “njëra nga krizat më të rënda humanitare në dekada”.
Gjatë një vizite në ishullin e skatërruar, Ban u bëri thirrje haitianëve të jenë më të durueshëm, ndërsa bashkësia ndërkombëtare po ndërmerr veprime për të dërguar ushqim dhe ndihma mjekësore.
Ban u zotua t’i përshpejtojë operacionet e shpëtimit dhe të përmirësojë koordinimin e ndihmave, duke shtuar se OKB-ja planifikon të nisë të ndajë ushqim për rreth dy milionë njerëz.
Gjatë qëndrimit të tij në Port-o-Prens, Ban gjithashtu i vizitoi gërmadhat e misionit të OKB-së, ku rreth 40 punonjës e humbën jetën nga shembja e ndërtesës.
