Gjashtëmbëdhjetë njerëz janë vrarë dje dhe sot në protestat e nxitura nga arestimi i një muzikanti vendas që kandidonte në zgjedhjet presidenciale.
Këngëtari vendas Bobi Wine, emri i vërtetë i të cilit është Robert Kyagulanyi, u arrestua të mërkurën për shkelje të rregullave të koronavirusit, sipas policisë.
Autoritete shtonin se vdekjet kishin ndodhur gjatë përplasjeve në operacionet e sigurisë, ku gjithashtu 65 njerëz ishin plagosur, por pa shpjeguar shkakun e vdekjeve apo natyrën e plagosjeve.
Muzikanti i ri ishte mes 11 kandidatëve që sfidonin presidentin Yoweri Museveni, i cili është në pushtet që prej vitit 1986.
Zgjedhjet presidenciale mbahen më 14 janar të vitit që vjen.
Në ditën e dytë të protestave të gjera në vend, forcat e sigurisë përdorën gaz lotsjellës dhe armë zjarri për të shpërndarë njerëzit në kryeqytetin e Ugandës, Kampala.
Në video të shpërndara në rrjet shiheshin njerëz me rroba civile që qëllonin në ajër me armët e tyre. Ndërsa demonstruesit kanë djegur goma dhe koshë mbeturinash, duke bllokuar rrugët në qytet.
