Në tryezën e organizuar nga Oda Amerikane, të titulluar “Promovimi i Grave në Ndërmarrësi dhe Vendimmarrje”, është diskutuar për sfidat me të cilat ballafaqohen gratë, duke filluar nga numri i vogël i grave të punësuara, pagat e ulëta dhe një sërë sfidash të tjera.
Atifete Jahjaga, ish- Presidente e Kosovës tha se çështja e fuqizimit të rolit të gruas po bëhet më e rëndësishme, duke shtuar se roli i tyre është i rëndësishëm në zhvillimin ekonomik dhe stabilitetin e prosperitetin e vendit.
“Grave për një kohë të gjatë u janë mohuar të drejta që janë të drejta njerëzore që ua mundëson atyre të kenë një jetë dinjitoze. E drejta për votë, pjesëmarrëse në politikë pronësi, qasja për të pasur burime financiare. Jemi dëshmitarë të përmirësimit të rolit të gruas në familje në shoqëri, ky progres që e shohim sot nuk ka ndodhur vetvetiu por falë luftës së vazhdueshme të shoqërisë sonë. Ka ndodhur falë grave të guximshme qe kanë thyer stereotipat gjinore”, ka thënë Jahjaga.
Ndërsa, Florije Xhemajli, Menaxhere e Projektit në Fondacionin Jahjaga tha se 82 përqind e grave janë të papunësuara. Sipas Xhemajlit edhe në ndërmarrësi është një numër i vogël i grave, rreth 10 përqind.
Lisa Magno, Shefja e Misionit të USAID në Kosovë tha se vetëm 20 përqind e grave punojnë në Kosovë, ndërsa 10 përqind e grave janë udhëheqëse të ndërmarrësisë.
Ajo ka thënë se USAID-i është i përkushtuar t’i ndihmojë gratë e Kosovës. Ajo ka inkurajuar gratë në ndërmarrësi që t’i trajtojnë gratë e punësuara dinjitetshëm.
