Haradinaj: Do ta trajtojmë me legjitimitet kërkesën për shkarkimin e Rikalos - Bota Sot
Haradinaj: Do ta trajtojmë me legjitimitet kërkesën për shkarkimin e Rikalos

Aktuale

Haradinaj: Do ta trajtojmë me legjitimitet kërkesën për shkarkimin e Rikalos

Më: 24 dhjetor 2018 Në ora: 17:21
Ramush Haradinaj

Kryeministri Ramush Haradinaj tha sot se do të trajtojnë me legjitimitet kërkesën e Partisë Socialdemokrate (PSD) për shkarkimin e ministrit të Bujqësisë, Nenad Rikalo, ndërsa ka përjashtuar mundësinë që projektligji për dialogun ndërhyn në kompetencat e presidentit Hashim Thaçi në lidhje me procesin në Bruksel.

Sipas kreut të ekzekutivit, të gjitha temat e propozuara nga PSD-ja, kanë legjitimitet dhe në këtë mënyrë edhe do të trajtohen, përfshirë edhe atë për shkarkimin e të parit të MPBZHR-së.

Haradinaj: Do ta trajtojmë me legjitimitet kërkesën për shkarkimin e Rikalos

“Çështja e ministrit Rikalo është njëra prej tyre, dhe kërkesa e ka legjitimitetin e vet dhe si e tillë do të trajtohet, me legjitimitet, me seriozitet. Për data e për këto mos më detyroni me fol, por është kërkesë legjitime”, tha Haradinaj.

Në konferencën pas mbledhjes së Qeverisë ku u miratua projektligji për dialogun, Haradinaj tha se ky projektligj nuk ka pësuar asnjë ndërhyrje, duke shtuar se është ai që është diskutuar në kuadër të rezolutës.

Ai ka përjashtuar edhe mundësinë se ky projektligj ndërhyn në kompetencat e presidentit Hashim Thaçi në dialogun me Serbinë.

Haradinaj: Projektligji për dialogun nuk ndërhyn në kompetenca të presidentit

“Për besë nuk mundem me e definuar këtë, sponsorizuesit e ligjit e kanë menduar këtë si kornizim. Këto janë korniza ligjore të angazhimeve të delegacionit, por nuk ndërhynë në kompetenca të presidentit. Nuk është i këtillë, por vetëm i jep bazë ligjore funksionimit të delegacionit”, tha ai.

Sa i përket deklaratës të presidentit Thaçi se do të kërkojë nga Qeveria që t’u rriten pagat të gjithë ushtarëve, në mënyrë që ata të kenë jetë të dinjitetshme, Haradinaj u shpreh se e mirëpret një gjë të tillë.

Haradinaj: E mirëpresim propozimin konkret të presidentit

“E mirëpresim kurdo që vjen propozimi konkret, ne jemi në gjendje me e shqyrtuar”, tha ai.

Me këtë rast, Haradinaj është pyetur edhe për peticionin për bashkimin e Mitrovicës, ku e ka quajtur të pakuptimtë pritja për bashkimin e saj.

Haradinaj: Mitrovica është ndarë, e pakuptimtë me pritë që e bashkojmë ne të njëjtit

“Për Mitrovicë nuk kemi pas nevojë me e nda që me e bashku tash prapë. Po më duket jo serioze ajo që po ndodhë atje. Ne të njëjtit njerëz jemi. Nuk është dashtë me e nda atëherë që me e bashkuar tash. Nën 1, ajo është ndarë. Tash me prit që e bashkojmë ne të njëjtit, po më duket pak e pakuptimtë”, tha ai.

Haradinaj ka folur edhe për seancën e thirrur për të mërkurën. Sipas tij, është legjitime që opozita të kërkojë seancë, porse pati disa fjalë për LDK-në dhe Vetëvendosjen.

Ai ka përsëritur se kjo e fundit edhe ashtu ka mbajtur një qëndrim ndryshe, pa u përfshirë në çështje të rëndësishme, ndërsa u shpreh se është e çuditshme se si është vetëpërjashtuar LDK-ja.

Krejt në fund, i pari i Qeverisë foli edhe për problemet me rrymë. Ai kërkoi nga KEDS që të ketë kujdes me ‘sjelljen’ e tyre.

Haradinaj: KEDS të ketë kujdes

“Me energji është një problem i madh në Kosovë. Ka një luftë. KEDS-i ka nevojë ta furnizojë Kosovën veç me energji të Kosovës, por ne prodhojmë energji, rreth 800 vatë. Më shumë konsumojmë brenda një dite. Pjesa që blihet është më e shtrenjtë. Ata duhet të bëjnë kujdes me këtë sjellje. Do të vijë dita që na duhet të ballafaqohemi me këtë sjellje”, u shpreh ai.

Haradinaj tha se kapacitetet e Kosovës janë në maksimum, porse duhet pasur parasysh se është stina e dimrit dhe se nuk duhet të ketë probleme të tilla me energji elektrike.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...