Nëse Thaçi nuk ia dorëzon dokumentet ekipit negociator për dialogun, shkelet rezoluta - Bota Sot
Nëse Thaçi nuk ia dorëzon dokumentet ekipit negociator për dialogun, shkelet rezoluta

Aktuale

Nëse Thaçi nuk ia dorëzon dokumentet ekipit negociator për dialogun, shkelet rezoluta

Më: 14 janar 2019 Në ora: 17:02
Ekipi negociator

Të premten ishte dita e fundit kur Presidenti i Kosovës, Hashim Thaçi do të duhej që ekipit negociator të votuar në Kuvend, të ja dorëzonte dokumentacionin për mbarëvajtjen e procesit të dialogut të zhvilluar me Serbinë, në Bruksel.

Bashkëkryesuesi i dialogut, Shpend Ahmeti, ndryshe që javën e kaluar caktoi afate kohore, kësaj radhe nuk po e bënë të njëjtën. Por, thotë se do të ishte mirë që ta kenë atë dokumentacion para të mërkurës.

Sipas tij, Thaçi po heziton për të proceduar dokumentet e kërkuara për dialogun, ku përkundër kësaj, shprehet optimist se nuk do të mungojë bashkëpunimi.

Si delegacion shtetëror, Ahmeti thotë se presin që t’i kenë të gjitha informatat nga presidenti Hashim Thaçi.

Ahmeti: Po e shoh se ka hezitim për dokumentet

“Tekstet specifike, na u tha edhe në Bruksel, që nuk ka ndonjë marrëveshje që është bërë, është e shkruar e tash ka mbetur vetëm që të bëhet. Pra, këto janë të gjitha tema të diskutimit. Dëgjova që nuk është këtu presidenti, por në përgjithësi edhe Blerim Shala tha se janë të gatshëm në çdo minutë të na përgjigjen në ftesa për takime dhe po ashtu të na dorëzohet çdo gjë që kanë mbajtë gjatë takimeve në Bruksel. 1:38 Unë pres që do të ketë bashkëpunim dhe koordinim. Ka hezitim, po e shoh se ka një hezitim, megjithatë, jemi në fillim të këtij procesi të rëndësishëm... Nuk është që tash kom me shku në zyrë të presidentit, me e bastisë zyrën me lyp, nuk jemi as hetues e as prokurorë”, tha ai.

Ndonëse, këtë javë pritet që ekipi negociator të dorëzojë në Kuvendin e Kosovës platformën për dialogun, Ahmeti thotë se deri më tash kanë marrë vetëm disa informata gjysmake.

E në rast se presidenti nuk i dorëzon dokumentet e kërkuara ekipit shtetëror, i pari i PSD-së thotë se shkelet rezoluta.

Ahmeti: Nëse nuk bashkëpunon presidenti, shkelet rezoluta

“Besoj që në proces e sipër do ta kemi bashkëpunimin e plotë. Në qoftë se jo, atëherë kjo është shkelje edhe e rezolutës dhe besoj që edhe ligjit kur të hyjnë në fuqi, që të mos të kemi këtë bashkëpunim. Por, nuk pres që nuk do të ketë bashkëpunim. Deri më tani gjithçka ka shkuar mirë”, u shpreh ai.

Megjithatë, ai shprehet se është shumë me rëndësi që dokumentet të dorëzohen para të mërkurës, në mënyrë që të plotësojnë sa më mirë platformën që pritet ta dorëzojnë në Kuvend.

Ahmeti: Është e rëndësishme që të kemi dokumentet para të mërkurës

“Deri më tash disa informata gjysmake i kemi marrë. Mirëpo ideja është që edhe nesër deri të mërkurën, kur e kemi takimin me delegacionin shtetëror ku diskutohet për platformën, t’i kemi edhe këto, edhe të kemi inputin e presidencës në atë platformë, që në qoftë se ka tekst i cili do ta vështirësojë punën më vonë, nuk do të ishte mirë që të mos ta kemi atë si informatë”, tha ai.

Eugen Cakolli nga KDI thotë se presidenti i vendit duhet t’i dorëzoj ekipit negociator dokumentet që posedon për dialogun.

Ai thotë se që nga përfshirja e presidentit Thaçi në këtë proces të dialogut, është vërejtur se ka një tendencë që ky i fundit të jetë prijës i ekipit të dialogut.

Cakolli: Presidenti duhet t’i dorëzojë dokumentet ekipit shtetëror për dialogun

“Presidenti Thaçi duhet që në frymën e bashkëpunimit dhe mirëbesimit ndërmjet delegacionit shtetëror si i mandatuar nga Kuvendi dhe institucionit të presidentit, me mandatin e tij kushtetues, t’i ofrojë gjithë dokumentacionin që është në posedim nga ana e presidencës mbi atë se çfarë është biseduar, në mënyrë që ky proces  të jetë i shoqëruar nga një transparencë që do ta rriste edhe nivelin e llogaridhënies ndaj qytetarëve në përgjithësi, por do të kishte ndikim edhe në vet integritetin e procesit zgjedhor”, u shpreh ai.

Cakolli shprehet se edhe anëtarët e ekipit negociator duhet të tregojnë transparencë për atë që bisedohet në Bruksel, pasi që thotë se vet këta të fundit dikur e kishin përshkruar këtë proces si “proces të territ informativ”.

Cakolli: Ekipi shtetëror të jetë transparent para qytetarëve për bisedimet në Bruksel

“Në rast se ekipi negociator do t’i kishte këto dokumente, do të duhej që sapo t’i marrë në rastin tonë, t’i raportojë para Kuvendit të Kosovës  mbi atë se çfarë është diskutuar në Bruksel herën e fundit dhe të arriturat e deritashme, për shkak se vet këta të fundit kanë thënë se ky proces është shoqëruar nga një terr informativ dhe në posedim të këtyre dokumenteve do të duhej që ata të bënin gjënë më normale, që është informimi i publikut mbi atë se çfarë ka ndodhur deri më tani me dialogun”, tha Cakolli.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...