Shefi i Grupit Parlamentar të Partisë Demokratike të Kosovës, Memli Krasniqi, i ka reaguar nënkryetarit të Lidhjes Demokratike të Kosovës, Lutfi Haziri, pas deklaratës së tij se PDK’ja i ka ofruar LDK’së bashkëpunim për rrëzimin e Qeverisë Haradinaj.
Krasniqi ka thënë në emisionin “Pressing”, se “Haziri mashtroi opinionin publik” me deklaratën e tij të dhënë mbrëmë në të njëjtën studio televizive.
“Është e pavërtetë e madhe. Klasike. S’ka se si i thuhet ndryshe”, është shprehur Krasniqi.
Sipas tij, “asnjë njeri i PDK’së me asnjë njeri të LDK’së s’ka folur për ndryshim të qeverisjes”.
“Është problematike kur një nivel i respektueshëm, i një partie të respektueshme, për arsye që unë nuk i di, thotë diçka të tillë”, ka vlerësuar Krasniqi.
Ai ka thënë se marrëveshja e koalicionit mes PDK’së dhe partisë së kryeministrit Ramush Haradinaj, Aleancës për Ardhmërinë e Kosovës, është “valide dhe efektive”.
Ai ka thënë se e tillë kjo marrëveshje bashkëqeverisjeje do të jetë “deri në fund të këtij mandati”.
