Komisioni për Zhvillim Ekonomik, Infrastrukturë, Tregti, Industri dhe Zhvillim Rajonal ka kthyer prapa projekt-statutin e Trepçës, si rezultat i mos harmonizimit të amandamenteve nga qeveria, sindikata dhe bordi i Trepçës.
Pas vërejtjeve që dhanë deputetët e këtij komisioni, pati një dakordim që Bordi i Trepçës të sjellë para tyre një dokumentacion të plotë dhe, jo me orare të takimeve siç konsideruan të jetë draft-statuti i paraqitur.
Ata u treguan pothuajse të një mendjeje se Komisioni për Zhvillim Ekonomik nuk duhet të "fusë duart" në draft-statut, pasi që, sipas tyre, kjo është përgjegjësi e bordit.
Deputeti i Vetëvendosjes, Liburn Aliu vlerësoi se draft-statuti aktual është i njëjtë me atë që ka qenë më parë.
Sipas tij, mënyra më e mirë është që bordi të jap vërejtjet e veta, pasi propozuesi i statutit me ligj është bordi dhe sipas tij, nuk duhet që Komisioni të ndërhyjë në draft-statut.
Aliu: Kuvendi nuk ka pse të shtijë në dorë statutin e Trepçës
“Mendojmë që rruga edhe më e shpejtë, edhe më efikase, është që Bordi bashkë me Qeverinë t’i inkorporojnë këto vërejtje në statut dhe mos t’ia lënë këtë punë komisionit dhe Kuvendit. Nëse ne si Kuvend e marrim përsipër me e ripërpilu statutin, ne bimë në kundërshtim së pari me ligjin dhe e dyta mund të bëjmë gabime... 6:45 Pse këtë punë na e leni neve, këtë nuk po mundem me e kuptu. Pse duhet na tash me e marr me i shti duart në statut e me e ndryshu me bë amendamente. Është rrugë e gabueshme dhe e gjatë”, tha ai.
Të njëjtin mendim ndau edhe deputetja Hykmete Bajrami, e cila u shpreh kundër “futjes së duarve” në draft-statut, pasi tha se nuk kanë të drejtë ligjore ta bëjnë një gjë të tillë.
Sipas saj, kjo bëhet përmes amendamenteve, derisa theksoi se përgjegjësia është e aksionarëve.
Bajrami: Të kompletohet draft-statuti, përmbanë minutat e takimeve
“Ne sot e kemi një propozim, nuk kemi një dokument që thirret ‘Marrëveshje në mes të Qeverisë dhe Sindikatës’. Jo, nuk thirret marrëveshje, kryetare. Janë minutat e takimeve dhe janë listat të cilat janë të nënshkrime... Ne e kontestojmë që në draft-statut munden me dhënë propozime stafi i komisionit, do të thotë nuk mundet me dhënë”, u shpreh ajo.
Ndërsa deputeti i PSD-së, Dardan Sejdiu tha se Trepça ka edhe probleme tjera, ku sot e kësaj dite nuk dihet nëse ndërmarrja aksionare Trepça është ndërmarrje publike.
Sejdiu: Të mos përsëritet gabimi që kemi bërë me ligjin për Trepçën
“As ndërmarrje publike nuk po i thonë. Nuk po kemi guximin me i thënë as çka është: ndërmarrje publike. Sa i përket statutit, mendoj se nuk duhet me e përsërit gabimin që e kemi bërë me ligj. Pra, nuk kemi nevojë të ngutemi, nëse mundemi me e bë këtë punë me hapat që po i propozon deputeti Aliu. Pra, ne jemi plotësisht dakord me këtë qasje. Pra, Bordi le të na e sjellë dokumentin final, dhe sipas nenit 6 të ligjit për Trepçën ne e procedojmë”, u shpreh ai.
Ndërsa deputeti Muharrem Nitaj tha se këtu ka një ngatërresë. Sipas tij, në mungesë të një draft-statuti final, shihet se ka pasur telashe me metodologjinë e punës dhe kornizën e përpilimit të draftit.
E Memli Krasniqi nga PDK u shpreh se përtej përmbajtjes, duhet të realizohet edhe procedura për përpilimin e draft-statutit. Ai kërkoi nga Bordi që të sjellë para komisionit një tekst të integruar.
Ai luti anëtarin e bordit, Naser Pecin që të sjellë një dokument të kompletuar para komisionit, në mënyrë që të sjellin një dokument të integruar para komisionit.
Ky i fundit tha se fillimisht kishin menduar që të mos e ngarkojnë me shumë gjëra statutin. Peci theksoi se miratimi i statutit i hap rrugë Trepçës.
Pas kësaj, anëtari i bordit, Naser Peci tha se është e vështirë me u përfshi të gjitha në statut, teksa u shpreh se do të futin edhe asetet tjera aty, sipas rekomandimeve të grupit punues.
Peci: Ëshët vështirë me i përfshi të gjitha në statut, asetet tjera futen me kohë
“Si dokument themelues [statuti], sigurisht se vështirë është me u përfshi të gjitha, e dimë sa është komplekse Trepça në çdo aspekt, edhe në çështjet sociale. Mirëpo kjo që ka qenë ideja, që edhe kjo kolona e tretë që po e quaj tash, është shumë e përafërt me ato që u arritë marrëveshja. Edhe asetet tjera me kohë futen”, tha ai.
Kurse, Shyqyri Sadiku, kryetar i sindikatës së Trepçës, ka akuzuar Bordin e Trepçës si shkaktar të zvarritjes së procesit për draft-statutin.
Sipas tij, ky bord nuk i ka futur në draft-statut vërejtjet e dhëna nga sindikata.
Sadiku: Bordi i Trepçës është fajtor për gjithë këtë zvarritje
“Fatkeqësisht një bord i tillë që ka ardhur në Trepçë, krejt këto prolongime dhe zvarritje dihet se fajtor është Bordi i Trepçës. Bordi i Trepçës nuk ka dashur me bashkëpunu me Sindikatën”, u shpreh Sadiku.
Komisioni për Zhvillim Ekonomik, Infrastrukturë, Tregti, Industri dhe Zhvillim Rajonal vendosi që raporti i Panelit për zgjedhjen e Bordit të KOSTT t'i kalojë Kuvendit që të zgjedhë 6 anëtarë, nga 12 sa janë në listën e ngushtë.
Ndryshe, KosovaPress ka siguruar edhe listën me emrat e 12 kandidatëve që janë përzgejdhur për listën e ngushtë. Në vijim gjeni emrat e tyre të renditur sipas pikëve: Hekuran Murati, Muzafer Shala, Enis Berisha, Nagip Krasniqi, Migjen Kukaj, Nagip Skenderi, Shkëlzen Nuza, Sejdi Rexhepi, Nebih Zaqiri, Naim Sahiti, Neron Berisha, Habib Basholli.