Raportuesi për Kosovën në Parlamentin Evropian, Igor Sholtes, ka thënë se Kosova i ka përmbushur të gjitha kushtet për liberalizim të vizave, ndërsa ka theksuar se qytetarëve të Kosovës u është dhënë një premtim se pas përmbushjes së këtyre kushteve do të udhëtojnë pa viza, por se i njëjti premtim nuk është mbajtur.
Sholtes, në një intervistë për “europeaninterest”, tha se liberalizimi i vizave nuk e ndihmon drejt shmangies së izolimit vetëm Kosovën, por tërë rajonin.
“Kosova është i vetmi vend i Ballkanit Perëndimor ku ekziston ende kërkesa për viza. Kosova i përmbushi dy kushte të rëndësishme të ngritura nga Komisioni Evropian – lufta kundër korrupsionit dhe krimit të organizuar dhe të dytin, demarkacionin kufitar me Malin e Zi. Ky kushti i dytë ishte çështje e ndjeshme. Dhe më pas, siç kam thënë, nuk ndodhi asgjë. Dhe tani njerëzit në Kosovë ndihen të dëshpëruar, ata besojnë se vendi i tyre nuk e meriton këtë. Me këtë ju japim një shembull se sa problematike mund të jetë kur ju premtoni diçka, dhe nuk e mbani premtimin”, tha Sholtes.
Ai shtoi se Parlamenti Evropian e po ashtu edhe Komisioni Evropian kanë qëndrim pozitiv për sa i përket liberalizimit të vizave, por thekson se vendimi përfundimtar varet nga Këshilli i Evropës.
“Po flasim vetëm për liberalizim vizash, proces i cili nuk do ta ndihmonte vetëm Kosovën por tërë rajonin që t’i shmanget izolimit”, theksoi ai.
Tutje, raportuesi për Kosovën në Parlamentin Evropian, Igor Sholtes, tha se në raportin Kosovë-Serbi ka ende çështje të vështira.
“Krijimi i Kosovës ka hapur shumë kapituj. Por ky është një test për BE-në për të parë se sa mirë e njeh Ballkanin. Sepse Bosnja e Hercegovina paraqet po ashtu një problem pasi që është një shtet me regjim specifik dhe nacionalizmi boshnjak është në rritje”, theksoi ai.
