Lidhja Demokratike e Kosovës është shprehur se përkrah dialogun me Serbinë dhe se mbron miqësinë e përhershme me Shtetet e Bashkuara të Amerikës, në një reagim ndaj raportimeve të medieve se LDK kishte refuzuar SHBA-të në të kaluarën.
“Kosova është në një gjendje delikate prandaj nuk ka nevojë, pavarësisht animeve politike, të dezinformohet opinioni duke bërë krahasime të paqëndrueshme, ashtu si i bëri indeksonline.net se LDK para një muaji refuzoi ShBA-në ndërsa sot akuzon Qeverinë Haradinaj për mos heqje të taksës”, ka thënë LDK.
LDK ka deklaruar se qëndrimi i saj për dialogun dhe raportet me SHBA-të është shumë i qartë.
“LDK-ja është shprehur qartë për miqësi të përhershme me ShBA-në, ka përkrahur dhe përkrah dialogun për normalizim të mardhënieve me Serbinë, që rezulton në njohje reciproke të dy shteteve sovrane. Ky është qëndrimi i vërtetë dhe i vetëm i LDK-së”, thuhet në njoftimin e LDK-së.
“LDK, në këtë legjislaturë është parti opozitare dhe vepron nga opozita në mënyrë pozitive dhe konstruktive në interes të Kosovës dhe të stabilitetit në rajon dhe më gjerë”, ka thënë LDK.
