Deklaratave të zëdhënëses së BE-së, Maja Kocijançiq i është përgjigjur edhe kryetari i Kuvendit, Kadri Veseli.
I pari i legjislativit në një postim në rrjetin social Facebook, ka thënë se Trepça nuk është çështje e hapur për dialog me Serbinë.
Sipas Veselit, Bashkimi Evropian me këtë gjuhë po e rrënon perspektivën e dialogut dhe fqinjësisë së mirë.
“Trepça, as nuk ka qenë, as nuk është dhe as nuk do të jetë çështje e hapur në dialogun me Serbinë. Me këtë gjuhë, BE është duke e rrënuar çdo perspektivë të dialogut dhe fqinjësisë së mirë. Trepça është e drejtë natyrore e shtetit të Kosovës. Sot dhe përgjithmonë”, ka shkruar Veseli.
Për deklaratat e Kocijançiqit, kryeministri Ramush Haradinaj tha se BE-së i ka humbur rruga në oborrr.
Ndryshe zëdhënësja e Komisionit Evropian, për mediat serbe deklaroi gjatë ditës se për Trepçën do të vendoset në marrëveshjen finale ndërmjet Kosovës dhe Serbisë.
