Iana (Andreu) Minochkina, shtetase ruse, si dhe bashkëshorti i saj, Luis (Menduh) Bekteshi, shtetas shqiptar, dytë pjesëtarë të UNMIK-ut, janë arrestuar 3 ditë më parë për vjedhjen e një çante/kuletë në “Beneton”.
Prokurori kujdestar, Rrahim Podvorica, siç mëson Ballkani.info, fillimisht nuk kishte lejuar që të intervistohen apo të iniciohet rast ndaj tyre, por më vonë i kishte kontaktuar hetuesit kujdestarë, duke i udhëzuar që të ftohen palët e dyshuara dhe ndaj tyre të iniciohet rasti: Vjedhje.
Ky rast tani është duke u trajtuar nga Njësia e Hetimeve, kurse rusja Iana Minochkina dhe bashkëshorti i saj nga Shqipëria, Luis Bekteshi, ishin liruar menjëherë në procedurë të rregullt.
Por, kush është rusja Iana (Andreu) Minochkina, e cila është zënë duke vjedhur në “Beneton”?
Ajo është drejtoreshë ekzekutive e organizatës joqeveritare “Perspektiva”, me lokacion në Durrës. Para se të vinte në Kosovë, Minochkina kishte punuar edhe në Shqipëri.
Po ashtu, ajo një kohë kishte punuar edhe si ambasadore e të rinjve në OSBE.
Në bazë të informacioneve që posedon nga burime brenda organeve të sigurisë, veprimtaria e ruses Iana Minochkina është tejet e dyshimtë në Kosovë.
Qasja e saj në institucionet e Kosovës dhe Shqipërisë përmes aktiviteteve për të rinjtë në kuadër të UNMIK-ut, si dhe shtrirja e ndikimit të saj për gjoja ngritjen e vetëdijes dhe përmirësimin e edukimit të tyre, derisa në anën tjetër zihet duke vjedhur, vë në pikëpyetje tërë angazhimin “qëllimmirë” të saj.
Nga organet e sigurisë në vendin tonë, Iana (Andreu) Minochkina mësohet se ka kohë që është e dyshuar edhe për përfshirje në aktivitete spiunazhi në Kosovë, për interesa të shërbimeve sekrete ruse.
Me aktivitetin e saj, ajo gjatë gjithë kësaj kohe ka qenë shumë e angazhuar edhe për krijimin e një opinioni të mirë për Federatën Ruse tek të rinjtë e Kosovës dhe Shqipërisë.
Madje, sipas burimeve të Ballkani.info, Minochkina ka raporte të mira edhe me vetë shefin e zyrës ruse në Kosovë.
Rusia po vazhdon të bëjë përpjekje serioze për rritjen e ndikimit të saj në Ballkanin Perëndimor, përfshirën edhe në Kosovë, si dhe tashmë ekziston hapur një luftë e saj diplomatike për të dobësuar Bashkimin Evropian dhe përmbushur interesat e veta në rajonin tonë.
Rasti i vjedhjes së ruses Iana Minochkina dhe e bashkëshortit të saj nga Shqipëria, Luis Bekteshi, pjesëtarë të UNMIK-ut, së shpejti pritet të trajtohet edhe nga vetë UNMIK-u në Kosovë.
Megjithatë, përveç që ka pjesëtarë të UNMIK-ut me rol të dyshimtë, është edhe për keqardhje se çfarë niveli i njerëzve mund të jenë duke punuar në kuadër të misionit të tyre në Kosovë.
