Ministri i Arsimit, Shkencës dhe Teknologjisë Shyqiri Bytyqi, ka uruar 11 vjetorin e pavarësisë së Kosovës, duke thënë se 17 shkurti na e kujton çmimin e lirisë.
Bytyqi ka porositur që të punojmë shumë për vendin tonë, në mënyrë që ‘Kosovën e vogël si territori, ta bëjmë të madhe si emër në botë’.
Postimi i Bytyqit në Facebook
Të dashur nxënës, studentë, mësimdhënës, prindër, Të nderuar qytetarë,
Kosova jonë po feston 11 vjetorin e pavarësisë dhe kjo ditë e madhe bartë në vete shumë emra të heronjve, dëshmorëve e martirëve, bartë në vete djersën dhe mundin e shqiptarëve, punën e palodhshme të intelektualëve.
17 shkurti na e kujton çmimin e lirisë, prandaj, ne duhet të mësojmë, të studiojmë dhe të punojmë me përkushtim në secilën ditë të jetës sonë, që Kosovën e vogël si territor, ta bëjmë të madhe si emër në botë. Në këtë mënyrë nderojmë të rënët për liri, ata që u bënë krenaria dhe lavdia jonë, ata që u bënë pjesa më e ndritshme e historisë sonë. Vetëm në këtë mënyrë, ne sigurojmë të ardhmen tonë dhe të brezave që do të vijnë pas nesh.
Urime Dita e Pavarësisë! Gëzuar për shtetin tonë, për Kosovën tonë!