Britanikët i garantojnë Haradinajt mbështetje në rrugën evropiane - Bota Sot
Britanikët i garantojnë Haradinajt mbështetje në rrugën evropiane

Aktuale

Britanikët i garantojnë Haradinajt mbështetje në rrugën evropiane

Më: 17 shkurt 2019 Në ora: 15:43
Ramush Haradinaj, ka pritur në takim deputetët nga Mbretëria e Bashkuar

Kryeministri i Kosovës Ramush Haradinaj, ka pritur në takim deputetët nga Mbretëria e Bashkuar, John Grogan dhe Martin Vickers, pjesëtarë të Grupit të Miqësisë, Mbretëri e Bashkuar – Republikë e Kosovës, si dhe përfaqësues dhe sipërmarrës nga diaspora e Kosovës në Mbretërinë e Bashkuar.

Sipas komunikatës nga zyra për informim e Qeverisë së Kosovës, Haradinaj i ka njoftuar deputetët nga Mbretëria e Bashkuar me prioritetet e Qeverisë, përkushtimin në luftën kundër korrupsionit dhe krimit të organizuar, për zhvillimin ekonomik, përmbushjen e agjendës integruese të Kosovës dhe çështjet jetike për përmirësimin e jetës së qytetarëve.

Haradinaj ka falënderuar Mbretërinë e Bashkuar për mbështetjen e vazhdueshme që i ka dhënë dhe vazhdon t’i jap Kosovës në të gjitha etapat e shtetndërtimit të saj, duke kërkuar mbështetjen e mëtejme për proceset nëpër të cilat po kalon Kosova, anëtarësimin në organizatat ndërkombëtare dhe fuqizimin e subjektivitetit ndërkombëtar të Kosovës si dhe ruajtjen e sovranitetit dhe integritetit territorial të vendit.

Kreu i Qeverisë, në këtë takim ka bërë thirrje te sipërmarrësit kosovarë në Mbretërinë e Bashkuar që të investojnë në Kosovë, duke u kujtuar atyre politikat më të mira fiskale në rajon, ligjin për investimet strategjike dhe ofertën për partneritet dhe përkrahje nga ana e Qeverisë së vendit.

“Jemi me fat që kemi të rinj të shkolluar dhe të zotët në punën që bëjnë. Tani më shumë se kurrë ne kemi nevojë që këtë eksperiencë dhe përvojën e sipërmarrësve në vendet perëndimore ta transmetojmë tek të rinjtë tanë, në funksion të zhvillimit të vendit”, ka thënë Kryeministri Haradinaj, duke i ftuar sipërmarrësit kosovarë në Mbretërinë e Bashkuar që të vijnë me ofertë konkrete për ta implementuar në Kosovë.

Ndërkaq, deputetët nga Mbretëria e Bashkuar, John Grogan dhe Martin Vickers, pasi uruan kryeministrin Haradinaj për 11 vjetorin e Pavarësisë së Kosovës, theksuan mbështetjen e Mbretërisë së Bashkuar në proceset e rëndësishme dhe në rrugën evropiane për Kosovën.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...