Hamiti: Rugova udhëhoqi popullin drejt pavarësisë me përkushtim në ballafaqim me skeptikë - Bota Sot
Hamiti: Rugova udhëhoqi popullin drejt pavarësisë me përkushtim në ballafaqim me skeptikë

Aktuale

Hamiti: Rugova udhëhoqi popullin drejt pavarësisë me përkushtim në ballafaqim me skeptikë

Nga: Bota sot Më: 17 shkurt 2019 Në ora: 18:47
Muhamet Hamiti

Ambasadori i parë i Kosovës në Mbetërinë e Bashkuar Muhamet Hamiti, në 11-vjetorin e Pavarësisë së Kosovës, ka kujtuar Atin Themeltar të shtetit, Presidentin historik Ibrahim Rugova.

Hamiti, që ishte ndër bashkëpunëtorët e ngushtë të Rugovës, ka thënë se presidenti udhëhoqi popullin në rrugën e pavarësisë me përkushtim e devocion besimtari dhe në ballafaqim me skeptikë.

Ai ka vlerësuar se Dita e Pavarësisë së Kosovës, është arritja më e madhe e popullit të Kosovës.

Më poshtë postimi i plotë i Hamitit:

Festojmë pavarësinë, kujtojmë atin themeltar të shtetit, qëndrestarët

Në këtë ditë feste, në 11-vjetorin e Pavarësisë së Kosovës, kujtojmë me zemër e me emër të gjithë qëndrestarët, të gjallë e të vdekur, të gjithë luftëtarët për liri, demokraci e pavarësi të vendit tonë të dashur.

Sjellim në mend para të gjithëve Atin Themeltar të shtetit, Presidentin historik Ibrahim Rugova.

Ideja është e para.

Rugova udhëhoqi popullin në rrugën e pavarësisë me përkushtim e devocion besimtari, në ballafaqim me skeptikë, me miq e armiq, qoftë pse s’e donin, qoftë se nuk u dukej realist synimi i pavarësisë. Ibrahim Rugova ishte idealist realist, një nacionalist i kulturuar. Lufta e tij politike, rezistenca aktive paqësore e popullit, Republika e parë e Kosovës, shtruan rrugën për zgjidhjen e çështjes së Kosovës me luftë, mbasiqë Perëndimi u bind për drejtësinë e çështjes dhe për përkushtimin e shqiptarëve për luftë të pabarabartë me okupatorin në gjakimin e tyre për liri, demokraci e pavarësi. Për jetë të mëvetësishme e të dinjitetshme në trojet e veta.

Shteti është i pari. Kosova është e para!

Edhe një herë: gëzuar Dita e Pavarësisë së Kosovës! Ta festojmë sot e mot arritjen më të madhe të popullit të Kosovës!

(Post scriptum: pushteti është kalimtar. Për qeverisjen e keqe, për rrezikuesit e shtetit e të tërësisë së tij tokësore, për cenet e shoqërisë sonë, për kompromiset me të keqen, herë të tjera. Jo në këtë ditë feste.)

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...