Kryeministri Ramush Haradinaj i ka quajtur spekulime pohimet e medias gjermane “Frankfurter Rundschau”, se ndarja ndërmjet Kosovës dhe Serbisë në vija etnike është marrëveshje e përkrahur nga Shtetet e Bashkuara të Amerikës dhe Bashkimi Evropian.
Ai me këtë rast tha prerazi se nuk ka eksperimente me kufijtë e Kosovës dhe paralajmëroi se nëse ndodh një gjë e tillë, atëherë do të ketë ndjekje penale për të gjithë ata që e shkelin Kushtetutën.
Haradinaj: Nuk ka eksperimente me kufi e as territore
“I kam parë këta artikuj, janë disa do të thotë, mu më pëlqej artikulli tjetër, deklarimi i ministrit Heiko Mass, që Kosova i kryer reformat, ata që janë me u respektuar, nuk mendoj që artikujt tjerë kanë peshë. Pra, nuk janë të peshës së që na duhet me i marr seriozisht...Nuk bëhen këso eksperimente me Kosovën, duhet ta kuptoni këtë, nuk do të ketë eksperimente të tilla me kufi e as me territore, nuk ka eksperimente. Kosova është një, është e 17 shkurtit. Kushtetuta jonë vetëm një Kosovë e njeh, kushdo tjetër që e diskuton, janë duke bërë shkelje të Kushtetutës edhe ligjore, edhe ata do të ndiqen penalisht”, ka deklaruar Haradinaj.
I pari i Ekzekutivit po ashtu bëri të qartë se kufijtë aktual të Kosovës nuk mund të ndryshojnë dhe se çdo gjë tjetër për ndryshimin e tyre është vetëm spekulim.
Haradinaj: Kufijtë janë trashëguar me Pavarësinë e Kosovës
“Kosova ka kufij me Serbinë, me tërë gjatësinë kufitare, ruhet kufiri në të dyja anët. Në njërën anë nga Policia e Kosovës në anën tjetër nga ana e Serbisë. NATO e di këtë kufi është i shënuar, është kufiri administrativ i dikurshëm i ish-Jugosllavisë, kushtetuta e ish-Jugosllavisë se kufijtë e republikave nuk mund të ndryshohen pa dakordimin e dy palëve, në rrafshin e krahinave e po ashtu pa aprovimin e Parlamentit. Kufiri administrativ Kosovë-Serbi, është po ai kufi në të cilat e ka marrë përgjegjësinë NATO, në vitin 99, e të cilin e kemi trashëguar me deklarimin tonë shtet i pavarur, sovran...Bazuar në këto, të gjitha të tjerat janë spekulime ”, ka thënë Haradinaj.
Ndërkohë që është përfolur se marrëveshja ndërmjet Kosovës dhe Serbisë do të nënshkruhet në qershor, kreu i Ekzekutivit ka pohuar se një marrëveshje do të jetë e mundshme, por pa i ndryshuar kufijtë aktualë.
Haradinaj: S’ka republikës serbe në Kosovë
“Çdo herë është e mundur një marrëveshje, por jo një marrëveshje ndryshe përpos në kufijtë ekzistues, pa Republikën Serbe në Kosovë”, ka thënë ai.
Ndërsa për liberalizimin e vizave, kreu i Qeverisë shprehu besimin se në qershor të këtij viti qytetarët e Kosovës mund të lëvizin lirshëm në vendet e tjera.
Haradinaj: Në qershor do ta marrim liberalizimin e vizave
“Për këtë e ceka këtë deklaratën e ministrit gjerman që thotë se janë për t’u respektuar reformat. Bazuar në këtë vlerësim unë mendoj që po shkojmë kah liberalizimi. Unë shpresoj shumë se në qershorin e këtij viti do ta marrim atë që është e drejtë e jona, pra liberalizimin e vizave”, tha kryeministri Haradinaj.
Haradinaj nuk kurseu as akademinë për 29-vjetorin e rënies së atdhetarit dhe diplomatit Enver Hadri, pa folur për taksën dhe dialogun. Ai tha se dialogu është devijuar nga qarqet në Kosovë e Bruksel.
Haradinaj: Dialogu u devijua nga disa qarqe në Kosovë e në Bruksel
“Sot 20 vjet pas çlirimit dhe kur po hyjmë në dekadën e dytë të pavarësisë, dialogu për normalizimin e marrëdhënieve ndërmjet Kosovës dhe Serbisë u devijua nga disa qarqe në Kosovë e në Bruksel duke u shndërruar në dialog për territore. Prandaj, sot na duhet shembulli i heroit tonë Enver Hadri që të mos na përsëritet historia. Vendosmëria për të qëndruar në të drejtën e Kosovës të 17 shkurtit, është rreshtim në anën e drejtë të historisë dhe ne po ashtu me veprimin e marrë për të bllokuar mallrat e Serbisë, pra taksa 100 për qind, është po ashtu veprim që pengon formalizimin e një ndarje. Kosova nuk jep tokë për njohje edhe nëse ky është çmimi, Kosova nuk ka nevojë për njohje nga Serbia”, porositi Haradinaj.