Kryetari i Kuvendit të Kosovës, KadrI Veseli ka përsëritur edhe njëherë qëndrimin e tij rreth rëndësisë së ruajtjes së raporteve në mes të Kosovës dhe SHBA-ve.
Veseli theksoi se orientimi i Kosovës është perëndimor.
“Kemi vetëm një perspektivë dhe një qellim. Orientimi ynë nuk është pro-perëndimor, por po e theksoj se orientimi ynë është perëndimor. Ky orientim që nuk lejon në asnjë mënyrë dhe nga askush të cenojë ftohjen ose ndarjen me SHBA-të, por as me Bashkimin Evropian” është shprehur Veseli gjatë fjalimit në lansimin e Programin Financiar për Inovacion dhe Ndërmarrësi në Mitrovicë.
Veseli komentoi poashtu edhe dialogun, marrëveshjen e mundshme përfundimtare Kosovë-Serbi.
“Nuk na duhet ky debat i brendshëm për konsum duke krijuar shqetësime, frikë dhe pasiguri tek qytetarët. Ne nuk duhet me u marrë me njëri-tjetrin. Ne e kemi përballë një kundërshtar, jo njeri-tjetrin, por Serbinë”.
“Mitrovica dhe as Kosova nuk janë as me i jep, as me i shitë, as me i ble por as me i mbrojtë vet. Ne më së shumti mund ta mbrojmë Mitrovicën kur jemi bashkë, dhe secili ka obligimin qytetar kombëtar. Duhet të respektojmë ligjet dhe Kushtetutën”.