Malta mbështet Kosovën në rrugën e saj euroatlantike

Aktuale

Malta mbështet Kosovën në rrugën e saj euroatlantike

Më: 6 mars 2019 Në ora: 13:25
Carmelo Abela dhe Ramush Haradinaj

Ministri i Punëve të Jashtme dhe Tregtisë, të Maltës, Carmelo Abela, deklaroi sot se vendi i tij do të vazhdojë ta mbështesë Kosovën në rrugën e saj evropiane dhe në anëtarësimin në organizatat ndërkombëtare, si dhe qëndrimin e shtetit të tij për fuqizimin e partneritetit ekonomik, tregtar dhe kulturor.

Ai këto komente i bëri gjatë një takimi sot në Prishtinë me kryeministrin e Kosovës, Ramush Haradinaj, me të cilin bisedoi për zhvillimet politike dhe progresin e arritur në Kosovë, prioritetet e Qeverisë për zhvillim ekonomik, integrimet evropiane, si dhe fuqizimin në rend dhe ligj.

Kryeministri Haradinaj me këtë rast, tha se Malta është njëra nga vendet mike të Kosovës, duke zhvilluar gjithmonë raporte korrekte me këtë vend dhe se ky bashkëpunim do të vazhdojë meqenëse Kosova është e përkushtuar që të avancojë me raportet e ndërsjella në të gjitha fushat.

“Edhe në të kaluarën, ne gjithmonë kemi ruajtur dhe zhvilluar partneritet të mirë me Maltën dhe ky vend e ka mbështetur Kosovën në proceset ndërkombëtare. Sot ishte rast i mirë të ritheksojmë përkushtimin tonë, që të avancojmë më tutje me bashkëpunimin tonë, veçmas në këmbimet tregtare dhe në ato kulturore”, tha ai.

Duke e falënderuar për kontributin e Maltës dhënë për shtetndërtimin e Kosovës në të gjitha fazat e saj, kryeministri Haradinaj, tha se Kosova ka nevojë për zërin e Maltës në proceset e rëndësishme ndërkombëtare.

Haradinaj kërkoi nga ministri Abela mbështetjen e vendit të tij në anëtarësimin e Kosovës në mekanizmat ndërkombëtarë dhe në fuqizimin e subjektivitetit ndërkombëtar të vendit dhe në rrugën evropiane të tij.

commentFirst article
Sot mund të lexoni Shfletoni kopertinat