Gazeta beogradase "Blic" ka shkruar se aktualisht në Kosovë në lidhje me taksën janë duke u konfrontuar interesat e ShBA-ve në njërën dhe fuqive të mëdha në anën tjetër, transmeton “Bota Sot”.
Sipas kësaj gazete, përkundër qëndrimeve të ShBA-ve qëndron para së gjithave Britania. ShBA janë për marrëveshje të Beogradit dhe Prishtinës, ndërsa Britania sipas gazetës hapur është kundër marrëveshjes.
Amerikanët, sipas medieve kanë shprehur hapur qëllimin e tyre- njohjen e ndërsjellë edhe mundësinë për korrektimin e kufijve duke eliminuar skenarin e kaosit.
Për këtë shkak Amerika aktualisht dëshiron që me forcë të detyrojë liderët shqiptarë që të tërheqin taksën, sepse ai hap mund të keqpërdoret shumëfish nga ana e liderëve në Kosovë dhe të kalojë në dhunë në terren dhe kjo do të ishte vdekje e marrëveshjes me Beogradin.
Në anën tjetër, Britania e Madhe ka afërsi me kryeministrin e Kosovës Ramush Haradinaj, që është kundërshtari kryesor i caktimit të kufijve dhe largimit të taksës.
Sipas burimit të "Blic" nga Kuvendi i Kosovës, Britanikët tash pothuajse hapur punojnë kundër marrëveshjes. "Britanikët direkt punojnë kundër marrëveshjes, e gjithë kjo me tregimin se nuk janë për korrektimin e kufijve, sepse ajo do sillte me vete probleme të shumta, ndoshta në të gjithë regjionin. Qëllimi i britanikëve është i kundërt me qëndrimin amerikan dhe ai nënkupton Kosovën e tërë të pavarur të pranuar nga Serbia", ka thënë burimi i njohur për gazetën.
