Kanë kaluar më shumë se tre muaj qëkur ka nisur shqyrtimi fillestar për rastin më të përfolur, i njohur si “Pronto”, ku janë të përfshirë ministra e deputetë të PDK-së.
Gjykata ende është duke shqyrtuar nëse do ta aprovojë aktakuzën, gjë që pastaj mundëson fillimin e gjykimit.
Por, në këtë proces gjyqësor, ekziston edhe një kontest.
Qysh në seancën e dytë gjyqësore, prokurorja Drita Hajdari kishte kërkuar hetim disiplinor për shkelje të etikës nga ana e gjyqtarit Shashivar Hoti.
Kërkesën, ajo e kishte bërë pasi Gjykata Themelore refuzoi ankesën e saj për përjashtim të gjyqtarit Shashivar Hoti nga ky proces.
Megjithëse kanë kaluar më shumë se dy muaj, Zyra e Prokurorit Disiplinor ende është duke e hetuar lëndën.
Për shkak të hetimeve, Zyra për Media e ZPD-së nuk ka pranuar të japë më shumë informacione.
Prokurorja Speciale, Drita Hajdari, ka thënë se hetimi ndaj gjyqtarit Hoti nuk mund të ndikojë në vazhdimin e seancës gjyqësore në rastin “Pronto”.
Por, avokatët mbrojtës e quajnë të pakuptimtë hetimin disiplinor ndaj gjyqtarit.
Emrush Kastrati, avokat i Besnik Shurdhajt pret që brenda pak ditësh gjykata të marrë një vendim për këtë aktakuzë.
Gjykata Themelore e Prishtinës ka treguar se ende janë në fazën e kundërshtimit të provave dhe sapo kjo të përfundojë do të vendoset për hapat e tjerë.
Prokuroria Speciale e Kosovës kishte ngritur aktakuzë ndaj 11 personave, përfshirë ministrin Besim Beqaj, deputetin Zenun Pajaziti dhe ish-shefin e Grupit Parlamentar të PDK-së, Adem Grabovci, raporton ktv.
Ata akuzohen për shkeljen e statusit të barabartë të shtetasve dhe banorëve të Kosovës.
