Kryeministri Ramush Haradinaj i është kundërpërgjigjur shefes së diplomacisë të BE-së e cila ka deklaruar se për vazhdimin e dialogut Beograd-Prishtinë duhet të hiqet taksa e vendosur nga Qeveria e Kosovës.
Haradinaj përmes një postimi në Twiiter ka thënë se dialogu ka dalë nga binarët, para se Qeveria të vendoste taksën 100 % nga Serbia dhe Bosnja dhe Hercegovina, për arsye të tjera.
“Dialogu ka dalë nga binarët shumë kohë përpara se të vendosej taksa, Federica Mogherini. Mungesa e transparencës, mbështetja e propozimit për shkëmbim të territoreve dhe dështimi i implementimit të marrëveshjeve ekzistuese – këto janë arsyet. Dialogu mund dhe duhet të vazhdojë pa u ndërlidhur me taksën”, ka shkruar shefi i Qeverisë.
Kryediplomatja evropiane ka thënë në New York se në të njëjtën ditë kur të tërhiqet taksa, ajo do të thërrasë një takim të ri në kuadër të dialogut Kosovë-Serbi, për arritjen e një marrëveshje ligjërisht të detyrueshme.
