(E plotësuar) - Presidenti i Republikës së Kosovës, Hashim Thaçi, mori pjesë sot në manifestimin shtetëror “Epopeja e UÇK-së në Dukagjin”.
Presidenti Thaçi tha se në këtë ditë pas fillimit të fuqizimit të rezistencës së Ushtrisë Çlirimtare të Kosovës në krye me komandantin legjendar Adem Jashari, dhe familjen Jashari dhe bashkëluftëtarë të tjerë, ndodhi ajo që pritej të ndodh edhe në Gllogjan.
“Ndodhi ajo që pritej të ndodhte, sepse bërthamat e para të Ushtrisë Çlirimtare të Kosovës tanimë ishin fuqizuar, ishin zgjeruar dhe sulmet ishin të pandërprera kundër forcave ushtarake dhe policore të Serbisë”, ka thënë presidenti Thaçi.
Kreu i vendit tha se Epopeja e Dukagjinit shënoi një kthesë historike në luftën për liri, çlirim dhe pavarësi.
“Madhështia dhe vlera më e madhe e kësaj date i shtohet kur kemi parasysh se më 24 mars 1999, 20 vite më parë, filluan bombardimet e NATO-s. E, bombardimet e NATO-s dhe kjo aleancë kosovaro-perëndimore nuk është lidhur rastësisht, por pikërisht falë rezistencës së Ushtrisë Çlirimtare të Kosovës, rezistencës së çdo qytetari të Kosovës kudo që ka qenë në Kosovë e diasporë, që ndihmuan luftën për liri”, ka theksuar presidenti Thaçi.
I pari i vendit ka shtuar se sot kujtojmë me pietet e respekt Epopejën e Dukagjinit, kujtojmë dhe vlerësojmë lart mbështetjen ndërkombëtare të cilën duhet ta ruajmë si sytë e ballit në rrugëtimin tonë për anëtarësim në NATO, Bashkim Evropian dhe raporte speciale me Shtet e Bashkuara të Amerikës.
Duke vlerësuar rezistencën dhe heroizmin e dëshmorëve të lirisë, duke respektuar Kushtetutën dhe ligjet e vendit, presidenti Thaçi i ka dekoruar me Urdhrin Hero i Kosovës, dëshmorët: Agim Ali Selmanaj, Arben Bajram Ahmetaj, Artan Ahmet Mehmetaj, Burim Sadik Mustafaj, Enver Hasan Halilaj, Fatmir Smajl Nimanaj, Hasim Misin Halilaj, Luan Gani Nimanaj, Naim Metë Nimanaj, Orhan Lan Halilaj, Sokol Muzli Sejfijaj, Shpend Zeqë Malaj.
***
Në organizimin e “Epopesë së Dukagjinit” që po mbahet në vendlindjen e kryeministrit Ramush Haradinaj në Gllogjan të Deçanit, pjesëmarrës është edhe presidenti Hashim Thaçi. Në një fjalë rasti në këtë manifestim, presidenti Thaçi, tha se Epopeja e Dukagjinit shënon një kthesë në luftën për liri dhe pavarësi. Duke vlerësuar edhe ndërhyrjen ushtarake të NATO-s dhe mbështetjen e shteteve ndërkombëtare ku tha se “ përkrahjen e tyre duhet ta ruajmë si sytë e ballit në rrugëtimin tonë në rrugën euroatlantike”.
Ditën e sotme presidenti Hashim Thaçi, e ka cilësuar ditë e rëndësishme dhe historike për Kosovën dhe kombin shqipëtar.
“Në këtë ditë që pas fuqizimit të rezistencës në krye me Adem Jasharin dhe bashkëluftarët e tjerë ndodhi edhe ajo që pritej të ndodhte edhe në Gllogjan. Sulmet ishin të pandërprera kundër forcave të Serbisë, epopeja e Dukagjinit shënon një kthesë në luftën për liri dhe pavarësi. Madhështia i shtohet kësaj date se po këtë ditë më 24 mars 1999 ndërhynë edhe forcat e NATO-s”, tha presidenti.
Shtoi se përkrahjen e ndërkombëtarëve duhet ta ruajmë si sytë e ballit.
S”ot kujtojmë me respekt Epopenë e Dukagjinit, dhe vlerësojmë lartë mbështetjen e ndërkombëtarëve që duhet ta ruajmë si sytë e ballit për rrugëtimin tonë në rrugën euroatlantike”, tha Thaçi.
Fjalimin e përfundoi duke ndarë dekorimet “Heroi i Kosovës” për 12 luftëtarë të Dukagjinit.
