Raportuesja për vizat në Parlamentin Evropian, Tanja Fajon, edhe një herë ka përsëritur se Kosova po bllokohet pa arsye, ndërsa Bashkimi Evropian (BE), nuk e ka mbajtur premtimin për vizat.
Parlamenti Evropian votoi sot sërish në favor të liberalizimit të vizave për Kosovën.
Përmes këtij votimi rikonfirmohet për të dytën herë mandati për fillimin e dialogut për liberalizimin e vizave për Kosovën.
Mirëpo, raportuesja për vizat në Parlamentin Evropian, Tanja Fajon, ka ripërsëritur se Kosova i ka përmbushur të gjitha kriteret e kërkuara.
“Qeveritë e shteteve anëtare të Bashkimit Evropian nuk përmbushën atë çfarë premtuan. Kosova ka përmbushur të gjitha kriteret për liberalizimin e vizave, siç njoftoi edhe Komisioni Evropian dhe derisa shtetet anëtare të BE-së po e bllokojnë këtë vend të vogël pa ndonjë arsye”, ka thënë Fajon.
Ndryshe, kryeministri Ramush Haradinaj e ka quajtur hap pozitiv votimin nga eurodeputetët por ka kërkuar që t’i japin drejtim dhe epilog çështjes së liberalizimit të vizave për Kosovën, si e drejtë e fituar dhe e pakontestueshme, tani kur bëhen shtatë vjet nga data kur na është dorëzuar udhërrëfyesi për vizat.
