Kryetari i Komisionit Hetimor Parlamentar në lidhje me ndriçimin e rastit të dëbimit të gjashtë shtetasve turq më datë 29 mars 2018, Xhelal Sveçla, ka bërë të ditur se Kryesia e Kuvendit të Kosovës është dorëzuar dhe pritet t’ia vazhdojë mandatin komisionit që ai udhëheq, në mënyrë që të arrijë ta përfunduar punën e tij.
Sveçla ka treguar ekskluzivisht në emisionin “DPT Te Fidani”, në televizionin T7, se Kuvendi i Kosovës do të diskutojë më 11 prill për vazhdimin e mandatit të komisionit për rastin e të ashtuquajturve gylenistë.
“Morëm vesh që Kryesia e Kuvendit, apo kryetari i Kuvendit, ka hequr dorë prej obstruksioneve të vazhdueshme të tij”, ka thënë Sveçla, duke iu referuar Kadri Veselit.
“Seanca e 11 prillit do të diskutojë për vazhdimin e mandatit të këtij komisioni”, ka njoftuar ai.
“Do t’i shtohet edhe për 30 ditë afati këtij komisioni, për ta vazhduar punën e tij”, ka treguar Sveçla.
Ai ka thënë se bllokada ndaj këtij komisioni “është bërë që të mbrohet presidenti i Kosovës”, i cili i ka dhënë urdhra dy udhëheqësve institucionalë që të bënin dëbimin e turqve nga Kosova.
Këtë, sipas Sveçlës, Hashim Thaçi mund ta ketë bërë për t’i larë ndonjë borxh presidentit të Turqisë, Recep Tayyip Erdogan.
