Haradinaj akuzon Mogherinin e Hahn për deklaratat rreth korrigjimit të kufijve - Bota Sot
Haradinaj akuzon Mogherinin e Hahn për deklaratat rreth korrigjimit të kufijve

Aktuale

Haradinaj akuzon Mogherinin e Hahn për deklaratat rreth korrigjimit të kufijve

Më: 15 prill 2019 Në ora: 13:00
Hahn, Haradinaj dhe Mogherini

Kryeministri i Kosovës, Ramush Haradinaj ka akuzuar përfaqësuesen e BE-së Federica Mogherini dhe komisionarin evropian për Zgjerim Johaness Hahn se me deklaratat e tyre për korrigjim të kufijve i kanë humbur një vit BE-së dhe Ballkanit.

Sipas tij, nëse nuk do të flitej për këtë temë, ndoshta marrëveshja mes Kosovës dhe Serbisë do të mund të arrihej.

Këto komente i ka bërë kur është pyetur për deklaratën e komisionarit Hahn, se nuk e përjashton mundësinë për të biseduar për korrigjimin e kufijve nëse pajtohet pala e Kosovës dhe ajo serbe.

Haradinaj: Diskutimi për territore, vazhdim i gabimeve të BE-së

"Është vazhdim i gabimit që po bën BE, që ka bërë Mogherini dhe komisionari Hahn, ata ia kanë humbur një vit BE-së dhe Ballkanit sikur të mos kishin folur për kufij e për territore ndoshta do ta kishim një marrëveshje. Një deklaratë që e lë të hapur mundësinë e bisedimit të territorit dhe kufijve është vazhdim i politikës së gabuar të këtyre evropianëve që po shkojnë fatmirësisht", deklaroi ai.

Sa i përket asaj se a ka mundësi që të arrihet një marrëveshje këtë vit, Haradinaj tha se me këtë evropianë që flasin për territore vetëm sa po shkojnë mbrapa.

Haradinaj: Po largohemi nga marrëveshja

"Me këta evropianë që po flasin për kufij e për territore vetëm sa po shkojmë mbrapa. Pra, nuk po afrohemi në ndonjë marrëveshje, por po vonohemi po largohemi", tha Haradinaj.

Ndërkaq, i pyetur se nëse ofrohet ndonjë marrëveshje më 29 prill në Berlin a do ta pranonte ai si kryeministër, Haradinaj tha se ai nuk ka mandat negocimi.

Haradinaj: Unë nuk kam mandat negocimi për një marrëveshje

"Unë nuk kam mandat negocimi për një marrëveshje. Parlamenti ynë ka votuar delegacionin shtetëror, por nuk bëhet fjalë me u diskutua për çfarëdo marrëveshje që ka të bëjë me territore dhe që lëviz kufijtë e Kosovës. Përfaqësuesja e lartë Mogherini, po edhe komisionari Hahn duke e toleruar një logjikë të tillë, ata e kanë vonuar marrëveshjen, ata e kanë vonuar Ballkanin dhe ata e kanë vonuar edhe BE-në realisht", u shpreh kryeministri.

Këto komente kreu i Qeverisë i ka bërë pas homazheve me rastin e shënimit të 20- vjetorit të rënies së dëshmorëve dhe martirëve të fshatit Sllovi të Lipjanit.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...