Avokati i njohur shqiptar: Shkëmbimi i territoreve, një turp historik - Bota Sot
Avokati i njohur shqiptar: Shkëmbimi i territoreve, një turp historik

Aktuale

Avokati i njohur shqiptar: Shkëmbimi i territoreve, një turp historik

Nga: N.H Më: 19 prill 2019 Në ora: 22:36
Avokati Spartak Ngjela

Avokati Spartak Ngjela, ka komentuar dialogun mes Kosovës dhe Serbisë. Në një prononcim për gazetën “Bota sot”, Ngjela pohon se dialogun mes dy vendeve po e kërkon Uashingtoni dhe Berlini, dhe se këta janë krijuesit dhe çliruesit e shtetit të Kosovës.

Ngjela me tej shton se doktrinat perëndimore të politikës për zgjidhjen e konflikteve kanë si epiqendër të tyre dialogun.

“Duhet të përqendrohemi në një pyetje: kush po e kërkon dialogun, dhe përse duhet? Dialogun po e kërkon Uashingtoni dhe Berlini. Këta janë realisht krijuesit dhe çliruesit e shtetit të Kosovës. Përse e duan këta me ngulm këtë dialog? Në fakt kjo është politikë. Doktrinat perëndimore të politikës për zgjidhjen e konflikteve kanë si epiqendër të tyre dialogun. Ky është kusht filozofik. Konflikti midis dy shteteve zgjidhet ose me forcë, ose me marrëveshje. Por edhe pas ushtrimit të forcës, sërish duhet të vijë një marrëveshje. Në rastin e Kosovës, konflikti u zgjidh me forcë në favor të Kosovës. Por sërish duhet marrëveshje. Deri këtu gjithçka është normale”, ka thënë Ngjela për gazetën “Bota sot”.

Sipas tij, anormaliteti filloi atëherë kur politikanë në Kosovë menduan të hynin në dialogun në pozicionin e humbësit, duke dorëzuar territore. Ndërsa këtë e ka quajtur edhe si një turp historik.

“Anormaliteti aktual i kësaj çështje filloi atëherë kur politikanë në Kosovë menduan të hynin në dialogun e marrëveshjes me Serbinë në pozicionin e humbësit, duke dorëzuar territore. Ky ishte një turp historik. Pavarësia e Kosovës është shpallur me konturet juridike të territorit. Gjithçka tjetër është shkelje e interesit kombëtar”, ka thënë ai.

Avokati Ngjela, e ka komentuar edhe kërkesën e opozitës në Kosovës për rikthim në pikën zero të procesit të dialogut. Ndërsa, ai ka nënvizuar se opozita në Kosovë nuk është proamerikane.

“Opozita në Kosovë nuk është proamerikane. Vetëvendosja nuk është lëvizje politike proamerikanë. Kjo mjafton për të thënë se nuk luan për interesin kombëtar. Megjithatë në kundërshtimin për shkëmbim territoresh, ajo ka qenë në linjën e drejtë të historisë”, është shprehur Spartak Ngjela për gazetën “Bota sot”.

Ndryshe, me 29 prill në Berlin është paralajmëruar që ta mbahet takimi i liderëve të Ballkanit Perëndimor, në të cilin do të marrin pjesë edhe presidenti i Kosovës, Hashim Thaçi dhe ai i Serbisë, Aleksandër Vuçiq.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...