Ministri i Kulturës, Rinisë dhe Sportit, Kujtim Gashi, ka bërë të ditur se është miratuar Koncept Dokumentin për Arkivat e Kosovës, përcjell “Bota sot”.
Këtë e ka bërë të ditur përmes një postimi në Facebook, ku ka shkruar se, pas propozimit tim, Qeveria e Kosovës ka miratuar Koncept Dokumentin për Arkivat e Kosovës.
Tutje Gashi shton se njëra ndër çështjet më të rëndësishme të këtij dokumenti është digjitalizimi i dokumenteve arkivore, si dhe shfrytëzimi i informacioneve që ofrojnë dokumentet të cilat do të ndikonin njëkohësisht edhe në ruajtjen fizike të tyre nga shkatërrimi i mundshëm fizik.
Postimi i plotë:
Pas propozimit tim, Qeveria e Kosovës ka miratuar Koncept Dokumentin për Arkivat e Kosovës, dokument ky i cili ka për synim zhvillimin e politikave në lidhje me përmirësimin e ngritjes dhe funksionalizimin e plotë të rrjetit arkivor, resurseve njerëzore, infrastrukturën fizike, grumbullimin e materialeve arkivore, digjitalizimin e dokumenteve etj.
Njëra ndër çështjet më të rëndësishme të këtij dokumenti është digjitalizimi i dokumenteve arkivore, si dhe shfrytëzimi i informacioneve që ofrojnë dokumentet të cilat do të ndikonin njëkohësisht edhe në ruajtjen fizike të tyre nga shkatërrimi i mundshëm fizik, e posaçërisht do ta ngriste efiçiencën për shfrytëzim më efikas të lëndës arkivore nga hulumtuesit. KG