Deputeti i Kuvendit të Kosovës, Armend Zemaj, pas konfirmimit se Ngadhnjim Kastrati është zgjedhur drejtor i RTK-së, ka thënë se interpretimi i ligjit nga Zyra Ligjore e RTK-së për zgjedhjen e Kastratit drejtor, përbën vepër penale.
Zyra Ligjore e RTK-së e ka legjitimuar votimin e ndodhur para pak ditësh, përmes të cilit Ngadhnjim Kastrati është zgjedhur drejtor i ri i Radio Televizionit Publik të Kosovës.
Pas zgjedhjes së parë të Ngadhnjim Kastratit nga Bordi i RTK-së, me 6 vota pro e një kundër, ishte çuar ligji për interpretim në zyrën ligjore të RTK-së, rezultati i së cilës doli sot dhe shpalli Kastratin drejtor të RTK-së.
Deputeti i LDK-së ka thënë se çdo interpretim i ligjit, normale të ligjit nga mekanizmat brenda institucionit punëdhënës, është i paqëndrueshëm dhe përbën shkelje të rëndë ligjore dhe me pasoja të veprës penale.
“Çdo interpretim tjetër i normave të ligjit nga mekanizmat brenda institucionit punëdhënës, është i paqëndrueshëm, rrjedhimisht pa efekt juridik dhe si i tillë përbën shkelje të rëndë ligjore dhe me pasoja të veprës penale të cenimit të të drejtave nga marrëdhënia e punës e cila sanksionohet me dispozitat e Kodit Penal të Republikës së Kosovës”, ka thënë deputeti Zemaj.
“Interpretues autentik i normës është ligjvënësi, në rastin konkret Kuvendi i Kosovës, përmes Komisionin përkatës funksional”, është shprehur deputeti i LDK-së.
Lajmin për zgjedhjen e Kastratit e ka konfirmuar edhe Afërdita Maliqi, kryetare e Bordit të RTK-së.
“Në bazë te interpretimit të zyrës ligjore e cila është konsultuar edhe me ekspertë të çështjeve juridike e kushtetuese bordi ka konstatuar se votimi për drejtor të përgjithshëm është i drejtë dhe Ngadhnjim Kastrati bëhet drejtor i përgjithshëm”, ka thënë ajo.
Në garë për të partin e RTK-së ka qenë edhe Festim Kabashi, i cili njihet për afërsinë me Ramush Haradinajn.
Kastrati në pozitën e drejtorit të RTK-së do ta pasojë Mentor Shalën.
Kujtojmë se votimi për drejtor të RTK-së kishte dështuar dy herë, për shkak të presioneve të ndryshme politike, dhe nëse do të dështonte edhe një herë konkursi do të duhej të përsëritej.