Kryetari i Kuvendit të Kosovës, njëherësh lider i PDK-së, Kadri Veseli, paralajmëron se shumë shpejt Kuvendi i Kosovës do të miratoj ligjin për Vlerat e Luftës së UÇK-së, i cili do ta rregullojë përfundimisht çështjen e Ditës Kombëtare të Dëshmorëve të Lirisë, por edhe themelimin e Muzeut Kombëtar të Luftës Çlirimtare.
Nëpërmjet një statusi në Facebook, Keyeparlamentari Veseli ka thënë se Ligji i ri, luftëtarëve të vërtetë të UÇK-së, familjeve të dëshmorëve, invalidëve të luftës dhe familjeve të martirëve, do t'u garantojë dinjitetin e munguar.
“Dinjiteti i UÇK-së nënkupton edhe që abuzuesit me lista të veteranëve të mos munden që edhe më tutje ta dëmtojnë nderin e luftës sonë për liri dhe buxhetin e shtetit. UÇK është vlerë sublime e kombit tonë, prandaj nuk do të lejojmë që emri dhe nderi i saj të njollosen, as nga armiqtë tanë, e as nga profiterët meskinë”, ka thënë Veseli.
Statusi i plotë i Kadri Veselit:
Në këtë ditë kur kujtohen e nderohen dëshmorët, dua t’i njoftoj qytetarët se
shumë shpejt Kuvendi i Kosovës do ta miratojë Ligjin për Vlerat u Luftës së UÇK-së. Me anë të këtij ligji, Shteti ynë do të mbrojë dinjitetin e sakrificave të popullit tonë për liri. Luftëtarëve të vërtetë të UÇK-së, familjeve të dëshmorëve, invalidëve të luftës dhe familjeve të martirëve, do t'u garantohet me ligj dinjiteti. Dinjiteti i UÇK-së nënkupton edhe që abuzuesit me lista të veteranëve të mos munden që edhe më tutje ta dëmtojnë nderin e luftës sonë për liri dhe buxhetin e shtetit. UÇK është vlerë sublime e kombit tonë, prandaj nuk do të lejojmë që emri dhe nderi i saj të njollosen, as nga armiqtë tanë, e as nga profiterët meskinë. Ligji për Vlerat e UÇK-së, po ashtu do ta rregullojë përfundimisht çështjen e Ditës Kombëtare të Dëshmorëve të Lirisë. Gjithashtu edhe themelimin e Muzeut Kombëtar të Luftës Çlirimtare. Gjithmonë krenar me Ushtrinë Çlirimtare të Kosovës.
