Shoqata e Bjeshkatarëve ”Rumia” nga Ulqini ditën e diel organizoi edicionin e sivjetëm të manifestimit tradicional gjithëpopullor ”Dita e Rumnisë 2019”. Ky udhëtim sivjet është zhvilluar nga një shtegtim, nga fshati Brisk, prej ku në ora 6-të të mëngjesit, 40-50 bjeshkatarë, adhurues të natyrës, traditës, historisë, kulturës dhe bjeshkatarisë etj., u ngjitën në malin e Rumisë. Atje u takuan me afro 20 kolegë kampistë të cilët kishin dalur një natë më parë dhe kishin fjetur atje.
Kryetari i shoqatës Fatmir Markashi thotë se masivizimi sivjet nuk ishte në nivelin e viteve të mëparshme . ” Numri i bjeshkatarëve që dolën sivjet në malin Rumi ishte më i vogël, pasi edhe temperatura e ajrit atë ditë po thuaj ishte ekstreme dhe bjeshkatarëve u shkaktoi vështirësi si asnjë herë më parë gjatë viteve të kaluara. Me këtë rast u zhvilluan garat popullore sportive tradicionale, në katër disiplina: hedhjen e gurit, kërcim nga vendi , qitjen me pushkë ajrore dhe tërheqjen e litarit. Në hedhjen e gurit vendin e parë e mori Hasim Shurna nga Prishtina, më së largëti nga vendi kërceu ArditAstafa, qitësi më i suksesshëm me pushkë ajrore u shpall MedinTagani, kurse ekipi veteran me kapitenin Riza Gjelloviq ishte fitues në tërheqjen e litarit.
Në këtë manifestim në mënyrë të organizuar munguan mysafirët e disa edicioneve të mëparshme, si grupi i bjeshkatarëvee nga Shkodra, Prishtina dhe Tetova”, thotë Markashi.
Megjithatë, ky manifestim, shton Markashi , ia arriti qëllimit, ruajtjen dhe përtëritjen e traditës shumëshekullore të popullatës vendore të daljes në majen e malit Rumisë, i cili konsderohet si simbol i ekzistencës së tyre. Rëndësi e posaçme e këtij manifestimi është edhe njohja me bukuritë natyrore të kësaj ane, shoqërimi i bjeshkatarëve dhe krijimi i njohjeve të reja ndërmjet tyre.
Sipas fjalëve të kryetarit të shoqatës Fatmir Markashit grupi i tij i bjeshkatarëve javën e ardhshme do të jetë mysafirë në manifestimin që do të fillojë në Kojë dhe do të përfundojë në malin historik të Greçës ( në Triesh) , të cilin e organizon Shoqata “ Labeatët” nga Malësia. Një javë më pas do të marrin pjesë në manifestimin “ Ditët e Lubotenit” në Kaçanik, të Kosovës. Markashi me këtë rast falënderon të gjithë sponsorët dhe donatorët e këtij manifestimi, duke filluar nga sipërmarrësit privat, Komunën e Ulqinit, Ndërmarmarrjen për Veprimtari Komunale e të tjerët. (Gj.Gonaj)
