Përgatitjet për manifestimin e nesërmen për shënimin e 20 vjetorit të hyrjes së trupave të NATO-s në Kosovë veçse kanë nisur në Prishtinë.
Për të marr pjesë në festimin e dekadës së dytë të çlirimit të Kosovës kanë ardhur edhe ish presidenti amerikan, Bill Clinton dhe ish sekretarja amerikane e shtetit, Madeleine Albright.
Mirëseardhje ish presidenti amerikan, Bill Clinton dhe ish sekretarja, Madeleine Albright u kanë uruar edhe qytetarët e Kosovës të cilët kanë vlerësuar se fal këtyre dy figurave kryesore populli i Kosovës e përjetoi lirinë dhe pavarësinë.
Tejet i nderuar për ardhjen e ish presidentit amerikan, Bill Clinton në Kosovë po ndihet Atdhe Geci i cili tha se Clinton është më meritori për çlirimin e Kosovës.
Sipas tij Kosova si një fshat i vogël para 20 viteve, sot ka arritur të jetë një shtet i zhvilluar.
Geci: Ardhja e tyre nderi i madh për gjithë kombin
“Ardhja e tyre është një nderim i madh për lirinë dhe pavarësinë e Kosovës, është një nderim i madh për popullin tonë, është një nderim i madh për flamurin dhe kombin, është një nderim i madh për çdo qytetar që në zemër e ka lirinë dhe pavarësinë....Ka ndryshime shumë të mëdha,kush di me i shikua dhe me i pa, shumë ka ndryshime ishte një katund, një fshat tani është një qytet...Mund të quhet edhe një festë kombëtare e Kosovës sepse është ardhja e më të nderuarve dhe më meritorëve për çlirimin e Kosovës”, u shpreh ky qytetar.
E Bekim Shabani ka thënë se Bill Clinton është njeri i madh i cili e shpëtoi popullin e Kosovës nga shfarosja.
Shabani: Bill Clinton njeri i madh për ne
“Nuk ka ma mirë si me e prit, ai neve na ka shpëtu, e presim me padurim...Ai njeri është i madh për ne”, u shpreh shkurt Shabani.
Amir Tusuni thotë se Kosova e ka obligim moral që t’i nderojë njerëzit të cilët e ndihmuan në çlirimin e saj. Tusuni ka thënë se Kosova 20 vjet pas hyrjes së NATO-s është zhvilluar shumë, madje sipas tij janë tejkaluar edhe pritshmëritë e ekspertëve.
Tusuni: Bill Clinton ka ardhur mes miqve të vet
“Vlerësoj se kanë ardhur në mesin e miqve të vet, Kosova e ka edhe obligim moral që njerëzit e tillë, kategorinë e tillë me i prit për secilin përvjetor. I 20-ti është pak më jubilar ata e kanë dhënë kontributin e vetë, nuk mundemi me e harrua atë kontribut...Pa marr parasysh aspektin e luftës Kosova për 20 vite është zhvilluar më shumë se sa që kanë pritur ekspertët sidomos ekonomik apo të fushave sociale, dhe këtë zhvillim që e ka përjetuar Kosova për 20 vite nuk besoj që e kanë pasur edhe vendet tjera”, deklaroi Tusuni.
Ndërsa Mehmet Neziri thotë se pritja për ish presidentin e Amerikës, Bill Clinton dhe ish sekretaren, Madeleine Albright duhet të jetë madhështore pasi që këta persona e shpëtuan Kosovën nga gjenocidi.
Ai thotë se Kosova po të udhëhiqej nga një klasë tjetër politike do ishte edhe më e zhvilluar.
Neziri: Fal Bill Clinton shpëtuam nga gjenocidi dhe katastrofa
“Po e vlerësojmë si një vizitë tejet të rëndësishme edhe meritën që e kanë ata është shumë pak një vizitë me qenë ose një pritje mos me qenë madhështore,ata çka kanë bërë për Kosovën është veprimi i tyre që ne sot jemi të lirë, jemi të shpëtuar nga gjenocidi dhe nga katastrofa...Kosova është zhvilluar deri diku, mirëpo Kosova nëse do të kishte njerëzit e duhur në pushtet do të ishte shumë më shumë e zhvilluar”, theksoi Neziri.
Ish presidenti amerikan Bill Clintion, dhe ish-sekretarja amerikane e shtetit, Madeleine Albright në Aeroportin Ndërkombëtar “Adem Jashari” jan[ë pritur nga ish presidentja Atifete Jahjaga.
Ndryshe, nesër në festën e dekadës së dytë të çlirimit të Kosovës në sheshin “Skënderbeu” duke filluar nga ora 11:00 do nisin tubimi qendror, pastaj nga ora 14:00 do të mbahet “Ecja për liri- Ecje e personaliteteve të larta ndërkombëtare dhe vendore deri te Busti i Sekretares Albright, më pas nga ora 14:35 deri në 14:50 do të përurohet busti i Albright te sheshi me emrin e saj. Në orën 15:00, do të bëhet vizitë në Bulevardin ‘Bill Clinton’, afër shtatores së ish- presidentit Clinton.
Për të ofruar siguri dhe rend nëpër kryeqytet janë shtuar edhe masat e sigurisë.
