Kryetari i Këshillit Kombëtar të Nismës Socialdemokrate, Jakup Krasniqi, ka thënë se nuk mund të heshtësh për problemet në Kosovë sepse ato nuk na i ka krijuar BE-ja, por na i ka krijuar politika e njerëzve shpirtngushtë që nuk kanë vizion e dije për të drejtuar kombin e shtetin në drejtimin e duhur.
Ai përmes një postimi në Facebook ka shkruar se, problemet tona politike zgjidhen me një vizion të qartë të cilin nuk e kemi as të kornizuar. Gjithashtu "regresi në qeverisje" nuk zgjidhet me konferenca shtypi, por me program të mirë qeverisës, sigurisht jo me programet e qeverive të shkuara, mbase as me ketë të qeverisë së sotshme.
Statusi në Facebook:
REGRESI NË KOSOVË KA HISTORI MË TË GJATË SESA NJË MANDAT
Kur njeriu i dëgjon e lexon lajme në mediet tona, lajmet e prodhuara nga politikanët, si "BE-ja po e trajton ndryshe Kosovën" apo "kjo qeveri po shënon vetëm regres" edhe po deshe të heshtësh nuk mundesh.
Pse nuk mundesh?
Nuk mund të heshtës se problemet në Kosovë nuk na i ka krijuar BE-ja, por na i ka krijuar politika e njerëzve shpirtngushtë që nuk kanë vizion e dije për të drejtuar kombin e shtetin në drejtimin e duhur.
Sigurisht edhe kjo qeverisje nuk është e duhura, por as ato parapraket nuk kanë qeverisur gjë më mirë. Qeveritë e kaluara na kanë sjellë në ketë gjendje, kjo e sotmja e ka vazhduar të njëjtin mentalitet të të qeverisurit dhe po vazhdon ta korrë atë që ia kishte mbjellë pararendësja.
Çështja është se problemet e grumbulluara nder vite nuk zgjidhen me kritika ndaj të tjerëve. Problemet tona politike zgjidhen me një vizion të qartë të cilin nuk e kemi as të kornizuar. Gjithashtu "regresi në qeverisje" nuk zgjidhet me konferenca shtypi, por me program të mirë qeverisës, sigurisht jo me programet e qeverive të shkuara, mbase as me ketë të qeverisë së sotshme.
Eh! sikur ta kishim një program qeverisës se paku të skicuar mirë e më përmbajtje shpresëdhënëse për qytetarët shpresëthyer! A diçka e tillë nuk po shihet në horizontet tona politike.
Të shpresojmë se politika e jonë do kthjellet një ditë!