Ish-ambasadori i Kosovës në Austri Sabri Kiçmari, ka reaguar pasi presidenti Hashim Thaçi ka liruar nga detyra këshilltarin e tij Branislav Nikoliqin.
Për Nikoliqin, u raportua se ishte ish-agjent i shërbimit sekret serb (BIA) kur ishte angazhuar si këshilltar i Thaçit në vitin 2016.
E ish-bashkëpartiaku dhe ish-bashkëpunëtor i tij, Kiçmari, ka thënë se Thaçi, pas këtij rasti do të duhej të dorëhiqej, përcjell Bota sot.
Ai ka marrë si shembull, rastin e kancelarit gjerman Willy Brandt, i cili ishte dorëhequr, pasi ishte vërtetuar se në Kabinetin e tij kishte depërtuar spiuni i STAS-it Günter Guillaume.
Këtë shembull sipas tij, do të duhej ta ndiqte edhe presidenti i Kosovës.
Reagimi i plotë i Kiçmarit:
Më 6. Maj të vitit 1974 dha dorëheqje një nga kancelarët më të suksesshëm të Republikës Federale të Gjermanisë z. WiIly Brandt. Dorëheqja e tij ishte një akt i marrjes së përgjegjësisë, si shef i Qeverisë Federale, pasi që u vërtetua se në Kabinetin e tij kishte depërtuar spiuni i STAS-it Günter Guillaume. Ja edhe një shembull tjetër i etikës politike, nga i cili do të duhej të mësoj presidenti.
