Deputeti i Kuvendit të Kosovës, Ilir Deda ka komentuar vendimin e Kushtetueses për Ekipin Negociator.
Përmes një postimi në Facebook, ai ka thënë se sot ka përfunduar edhe roli i presidentit Thaçi në këtë proces.
Sipas tij, vetëm Qeveria dhe kryeministri kanë të drejtë dhe bazë kushtetuese të mirren me dialog.
Ky është postimi i plotë i Dedajt në Facebook:
Mbas gati dy viteve u sqarua se nuk mund të ketë më “dialog Presidentësh”. Sot përfundoi edhe roli i Hashim Thaçit në dialogun me Serbinë.
Vendimi i Gjykatës Kushtetuese me të cilin zhbëhet Delegacioni Shtetëror për dialog me Serbinë e sjell edhe një vendim jashtëzakonisht të rëndësishëm – e sqaron kush ka mandat të udhëheqë dialogun me Serbinë.
Vetëm Qeveria dhe Kryeministri kanë të drejtë dhe bazë kushtetuese që të mirren me dialog – pikat 86, 87, 97, 98 dhe 107 të aktvendimit.
Ndërsa, Kuvendi e ka mandat, pra obligim, mbikqyrjen e politikës së jashtme dhe sigurisë, do të thotë dialogun me Serbinë – pikat 92 dhe 93 të aktvendimit.